AYSEL IŞIK/ŞÛJIN/AMED
Babete ser o Aktîvîsta Komeleya Ekolojîyî ya Amedî Feyzîye Sumere zî qisey kerde û seba vengvetişî veng daye her kesî.
Aktîvîste Sumere va ‘her serre Kurdistan de şewatê daristanan vejîyeno’ û wina dewam kerde: “Nê şewatî bi hawayo qestî yenî vetiş û taxrîbatê girdan virazenî. Kurdistan de daristanî zî her serre sey şarê kurdî xo newe kenî. Tena sebebêkê nê şewatan esto; o zî koçkerdişê şarê herême yo. Şarê herême ke tebîetî reyde cuyeno, nêşeno goreyê cuya bajarî bicuyo. Destûr nêdîyeno ke şar şewatî bimirêno. Rojawan de vera şewatî de her tewir tedbîrî yenî girewtiş. Çira ser tebîetî ra hende cîyakarîyî yenî kerdiş?”
Ganî ma wayîr bivejyî
Sumere peynîya qiseykerdişê xo de va ‘koyanê Kurdistanî de 20 hezar gandarî estî’ û wina dewam kerde: “Dengeyê tebîetî nê şewatan ver xira beno û neslê gandaran çinî beno. Qetlîyamê tebîetî seba heme dinya tehlukeyin o. Cok ra ganî destûr nêdîyo ke ekolojîyê Kurdistanî bêro bedilnayîş. Ganî her kes vera qetilbîyayîşê daristanan de hesas bibo. Bêrê ma wayîrê dinyaya xo bivejyî.”