Hadrekerdoxê Hadreyeya Bernameya 21’ê Sibate û rayberê Kurdî-Derî Nurî Aydogan vat ke ê dekewtî hewteyêke zaf muhîmî û wina vat: “Semedo ke no hewte de roşanê ziwanî esto û ma no roşanî do heme embazanê xo reyde bi bernameyan bivîyarnî. Labelê werekna ma her tim bi ziwanê xo reyde wina eleqeder bibîynê û bixebetnaynê ke hewce nêkerdê ke ma serre de tena yew roje wayîrê ziwanê xo bivejyî.
Her roj yew bername
Werekna hişmendîyêke wina bibîynê ke her kesê ke xo ra vanî ‘ez kurd a û kurdêkî bi şeref û rûmet a’ hayîdarê ziwanê xo bibîynê. Rayna dayîş û girewtişê xo heme bi ziwanê xo bikerdênê.”Hadrekerdoxê Hadreyeya Bernameya 21’ê Sibate û rayberê Kurdî-Derî Aydogan bal ant ser bernameya 21’ê Sibate û wina dewam kerd: “Bernameyê ma do heta 21’ê sibate dom bikera û ma do mîyanê yew hewte de her roj bi bernameyêke cîya bivejî duştê şarê xo. Bernameya ma de panelî estî, bernameyê radyo û televîzyonî estî û bername de pêvînayîşê esnafan reyde esta û ma do xebatê ke heta nika kerdo û sey nuşteyî çap kerdo, esnafan ra vila bikerî.”
Aşkerekerdişî
Aydogan wina dewam kerd: “Sewbîna 18’ê sibate de Akademîya Ahmedê Xanî û Dibistanê Azad do saet 12:00’î de pêreyde îzehet bidî çapemenî. 19’ê sibate zî Egîtîm-Sen û şaxê xo, Kurd Pen û Komeleya Nuştoxan zî do saet 12:00’î de pêreyde îzehet bidî çapemenî. 20’ê sibate saet 12:00’î de zî Enstîtu û Kurdî Der vernîya dezgeyê xo de do îzehet bidî çapemenî. Rayna 20’ê sibate de do ÎHD zî îzehetêkî bida. 21’ê Sibate de zî vernîya Meymanxaneya Şaredarî de Kongreya Komelê Demokratîk (KCD) do saet 12:00’î de îzehet bida û heme şar û dezgeyê ma dawetkerde yî. Hedefê ma o yo ke ma tîya ra dest pê meşîyayîşî bikerî û heta Mudirîya Perwerdeyê Netewe bimeşî. Ger ke vernîya ma bigirî ma do bertekê xo nîşan bidî.”Aydogan destnîşan kerd ke ê do roja şeme heme dezgeyê xo reyde Ofîs, Rezan, Kayapinar, Şehîtlîk, Huzurevlerî û Yenîşehîr de esnafan ra kartê xo vila bikerî.