Di daxuyaniyê de hat ragihandin ku êrîşên çeteyên DAIŞ'ê yên bi armanca dagirkirina Kobanê dane destpêkirin di roja 7. de bi hemû dijwariya xwe dewam dike û hat destnîşankirin ku bi saya berxwedana bêhempa ya hêzên YPG/YPJ'ê li her sê eniyên şer ên Kobanê, pêşveçûna çeteyên DAIŞ'ê hatine sekinandin. Navenda Ragihandinê diyar kir ku di navbera hêzên YPG û çeteyên DAIŞ'ê yên bi çekên giran êrîş dikin, li sê eniyan şer û pevçûn bi dijwarî dewam dikin. Di daxuyaniyê de hat gotin, "Pevçûnên gundên Ayn Betê, Quşlê, Xirxiriyê, Seylim û Kofî yên li rojhilat û başûr rojhilatê Kobanê bi awayekî dijwar dewam dikin. Çeteyan ji ser gundê Çemalî yê li ser sînorê Bakurê Kurdistanê hewl dan êrîş bikin. Dîsa hêzên me li hember çeteyan çalakiyan lidar dixin. Di pevçûn û çalakiyan de bi dehan çete hatine kuştin. Di yek ji van çalakiyan de encam hatiye zelakirin û li gorî vê yekê 5 çete hatine kuştin, 1 doçkaya 14.5 û 1 doçkaya 23 hatiye rûxandin. Di berxwedana li eniya rojhilat de 5 rêhevalên me bi lehengî gihaştine şehadetê." Navenda Ragihandê da zanîn ku li gundên Bobaniyê û Dualanê yên li rojavayê Kobanê jî êrîşên çeteyan zêde bûne û di encama bersiva tund a hêzên YPG/YPJ'ê de pêşveçûna çeteyan hatiye sekinandin.

Di daxuyaniya navendê de hat diyarkirin ku li eniya başûr jî pevçûn bi hemû dijwariya xwe dewam dikin û hat gotin: "Di şer û pevçûnên hefteyekê yên ji ber êrîşa çeteyan de, ji bilî encamên ne diyar ên 17 çalakî û çalakiyan, 232 çete hatine kuştin. 4 tank, 7 jê bi doçka giştî 20 wesaît, 7 doçka û hawanek a çeteyan hatine rûxandin. 17 çeka klêş, 2 çeka M16, 1 topa hawanê, 1 çeka BKC, 1 bombeavêja B7, 1 dûrbîn û 7 rextê çeteyan jî hatiye desteserkirin." YPG'ê da xuyakirin ku di şerê hefteyekê de bi giştî 32 şervanên YPG/YPJ'ê 'di encama berxwedaneke lehengî û fedaî de' jiyana xwe ji dest dane.

Li Serêkaniyê şer
Di dewama daxuyaniyê de der heqê şer û pevçûnên li Serêkaniyê de jî agahî hatin dayîn: "Di êvara 21'ê Îlonê de hêzên me li ser herêmên Rawya, Dehma û Mebruka yên li başûrê Serêkaniyê operasyonek destpêkirin. Di operasyonê de hêzên me beşêk mezin a bajarokê Mebruka ji çeteyan azadkirin û operasyon bi awayekî serketî berdewam dike. Di der barê operasyon û encamê vî de piştra ji rayagiştî re agahiyên berfireh werê parvekirin. Roja 21'ê Îlonê çeteyan DAIŞê xwestin li dijî navçeya Rabîa ya girêdayî Mûsil êrîşek lidar bixin. Êrîşên çeteyan hat astengkirin. Di pevçûnan de 10 çete hatin kuştin. Di şer de rêhevalekî me bi lehengî şer kir û gihîşt şehadetê."

NAVENDA NÛÇEYAN