Pratîkê enî awayî hetê eskerî ser Rojawan de ame dîtişî û ko hetê ey ê sîyasî zî Vakur de bi rayîrê weçînayîşê 7’ê hezîranî bêro dîtişî. Wexta desthilatî vînenê ke şarê kurdî bi siyasetê xo roc bi roc laver şino, eno awa mîyanê partîyanê înan de beno semedê tersî û înan fîneno mîyanê xebatanê antîdemokratîkan. 

Roco ke xebata weçînayîşî dest pê kerda ra tepya hukimatê AKPî bi heme awayî qiwetê xo dayo sîyakerdişê HDPî ser û cîya cîya tengasî û bûyeranê provokatîfan veceno. 

Dewleta ke çewres serro xo bi guna kurdan pay ra verdayo, nêwazena o destik destê ey ra vecîyo loma heta tera yeno dimayê xerakerdişê ravêreyîya çareserî geyrena. La şarê kurdî bîyo wayîrê îradeyêke zixmî û ko çiray rayîr nêdo înan ke enî waştişê xo bi ca bîyarê.

Weçînayîşî rê vîst û panc rocî mend û bi nizdbîyayîşê weçînayîşî dir partîyan lez da xebatanê xo. Helbet zey weçînayîşê bînan enî weçînayîşî de zî her partîyêke goreyê dîtişê xo xebata xo ya weçînayîşî rayîr ra bena. Aynan ra yew tera ancî AKP a ke enî weçînayîşê peyînan de bi bertîl û hîleyan amîya rayveberî ser û hewl dana ke weçînayîşê vernîya ma de zî ay rayîrî de şêro. La awayo ke eyseno dimayê dizdî û nêrayîrîya ke aye ser de amî tespîtkerdişî aye çimê şarê Tirkiyeye ra zî veta û rayê aye epeyî vistê. Kewtişê rayanê AKPî yê bi enî awayî serokkomarî zî qerqezneno û o çareyê xo di hêrîşberdişê HDPî ser de vîneno. 

La ko bi serkewtişê HDPî yê derbaskerdişê bendawe de bivîno ke bertîl û hîleyê merdimî zî heta cayêke şinê. 

Ko dimayê hewtê hezîranî fam bikero ke înkarkerdişê şaran rayîr ro nêqebûlkerdişê merdimî zî keno.

Bi rayîrê weçînayîşê hewtê hezîranî şansêke pîl vecîyayo vernîya şarê ma û şaranê Tirkiye û eke bizanê ay şansê xo bixebetnê ko rayveberîyêka demokratîk a, aştîwaştî û şarparêz o bîyarê rayveberî ser. 

Helbet wexta şar bianyo partîyanê estan ra ko ferqê partîya HDPî mîyanê înan ra rehet bivîno û bieşko bi zerrêka rehet e aye tercîh bikero. 

Xo ra HDP bi ca dayîşê cenî, bi ramoştişê xo yê şarparêzî, demokratîkî, aştîwaştişî û duristî zerre heme şaranê bindestan de ca giroto û ko bi qadroyanê xo yê şarparêz û heskerdeyê aştîyan xebatêka başa bido vernîya xo û Tirkiye, Kurdistan û heme Rojhilata Mîyanî de bibo viraştoxê aştî û demokrasîyêka di ca de rayveberî de bi ca bikero. 

Waştişê ma yo vernî û peynî pîya eno ke şarê ma û heme şarê ke enî welatî de cuyînê tercîhê xo hetê demokrasî û duristî ser bikerê û bi rayêka xo bo aştîya mîyanê şaran rê bibê wesîle. Serkewtiş namzetanê ma û şarê ma rê bo.


Nesrîn NAVDAR