Tecrîdêko girankerde ser Rayberê Şarê Kurd Abdullah Ocalanî de yeno meşnayîş û bitaybetî demanê peyênan de derheqê weşî û ewleyîya Rayberê Şarê Kurdî de xeberê cîyayî yenî vilakerdiş.
Babete ser o Parlamentera HDPyî ya Riha Dîlek Ocalane Meclîs de kombîyayîşê çapemenîye viraşte. Dîlek Ocalane dîyar kerde ke Birêz Ocalan 27ê Temmuza 2011î ra nata avûkatanê xo reyde û 11ê êlula 2016î ra nata zî keyeyê xo reyde pêvînayîş nêkerdo û wina va: “Reyna 3 serrî yo ke çi mektube, faks, telefon û sewbîna ti xebere Ocalanî ra nêameya girewtiş.”
Dîlek Ocalane va ‘mabênê 2013 û 2015î de prosesê çareserîye aver şî û no proses de hêvîyê şarî bîyî gird’ û wina domnaye: “Labelê Erdoganî seba ke îqtîdar de bimano, polîtîkayê xo yê Sûrîye kirişt mîyanê Tirkîya û prosesê aştîye qedêna. Îqtîdarê Erdogan û AKPyî herinda ke Tirkîya demokratîke bikero, şer aver berd. Helbuk birêz Ocalanî o wext vatbî ‘eke ma bişînbî Tirkîya de çareserî awan bikerî o wext ma do problemanê Rojhelato Mîyanênî zî çareser bikerî’. Bi no hawa nîşan dabî ke aştîya Tirkîya seba demokratîkbîyayîşê Rojhelato Mîyanênî kilît a.”
Îdîayî merdimî etirnenî
Dîlek Ocalane bale ante îdîayê ke demanê peyênan de ameyî parekerdiş ser û wina va: “Nê îdîayan ver merdim etirîyeno. Îzehetê Serdozgerîya Komare ya Bursa zî bes nîyo û nîno qebulkerdiş. Ma hîna hesabê ke nê xeberan eştî medyaya komelkîye ser zî nêdîyo. Nê kam î? Ma wazenî yê ke nê xeberan ra vanî ‘parekerdişê provokatîf î’înan ra pers bikerî; heta ke tecrîd bidomîyo, gelo do hertim no proses provokasyonan rê akerde nêbo? Eke ewro pêvînayîşî bibîyênê, do wina nêbîyênê.”
Dîlek Ocalane tewr peynî veng daye CPT, AÎHM û Miletê Yewbîyayeyan û wina qedênaye: “Tecrîd sucê merdimîye yo û mebênê ortaxê nê sucî. Ganî derheqê Birêz Ocalanî de melumatî raşteraşt ey ra bêrî girewtiş. Cok ra lazim o hukmat goş bido waştişê şarî û tecrîdî wedarno. Ganî derhal heyetêkî şêro Îmrali û pêvînayîş bikero.”
MA/ANQARA
Ganî tecrîd biqedîyo
Hemserekê Partîya Yewîya Demokratîke (PYD) Şahoz Hesenî zî wina va: “Tayê xeberî ameyî parekerdiş ke rewşa Rayberê Şarê Kurdî baş nîya, herçiqas ke selahîyetdaranê tirkî îzehet dayî, labelê nika bi mîlyonan kesan de gumanî estî. Çi heyf ke nika xeberêk nîna girewtiş. Nika avûkat û keyeyê ci nêşenî muracat bikerî. Şarê kurd bawerîya xo bi îzehetê selahîyetdaran nêano. Ez veng dana heme rêxistinê eleqederan ke wa fek hesabanê xo yê tengan ra verabidî. Ganî nê rêxitinî erjanê şarê kurdî bipawî. Ganî bi hawayo lez bikewî mîyanê têgêrayîşî ke Ocalanî reyde pêvînayîşî bibî.”
ANHA/QAMIŞLO