Nika tam waxtê birayenî yo, tam waxtê jûyenî yo. Heto jû ra birayê ma yê tirkî, heto bîn ra kî birayê ma yê kurdî. Waxtoke birayenî van, siyaset ra nêvan, partiyan ra nêvan. Siyaset de birayenî nêbena, gegane piya gurenayîs û piya hereket beno. Birayenî seweta mi mavênê şaran de bena. La nî rozan de birayê ma derheqê rewşa Kobanê de bevengî yê.

Başurê Kurdîstanî de kî kurdî ciwiyenê. Koka ma jû ya, derdê ma jû yê, dezê ma jû yê. Serokê herema Kurdîstanê Başurî birêz Mesut Barzanî Kobanê rê yardim rê veng dano, la bi xo kî şîndoran seweta yardimî ranêkeno. Nî rozanê peyenan de çeverê Sêmalka ra hem rojnamevanê kurdî hem kî wendekarê kurdî nêverdiyayî Rojava. Heyetêke wazenê na çever ra şerê Rojava, hukuymatê herema Kurdîstanî cirê beno mane. Nêverdano însanê ma şerê hewarê Kobanê. Hen oseno ke rayveranê Başurî hona tehlîkeyê verva pêro kurdan famnêkerdê.
Başurê Kurdan de kî hona xeyle cayî binê Bandira DAÎŞ derê. Hukumatê hereme dest de zaf îmkanî estê, la nî îmkanan kar nêano. Eke quwetê Başurî verva çeta DAÎŞ tam herb kuyê, o waxt DAÎŞ bi pêro quweta xo verva Kobanê herb nêrameno. Kes hukumatê Başur ra nêpîno ke quwetanê eskerî birusno Kobanê. La Hukumatê Başurî besekeno çekan birusno û çeveranê şîndorî rakero. Biyarîme xo vîrî, eke quwete PKK û PYD nêbiyenê, nika Hewlêr kî hukumatê Başur kî nêmendî bî. Sîyasevanê Başurî na demo niyanen de kî muhîmiya jûyena kurdan famnêkenê. Dormê Kobanê ceriyo, YPG û YPJ xoverdayîsode bê emsal danê, hukumatê Başurî hewno xorî dero. Dugelê Avrupa cirê çekan rusnenê, hukumatê Başurî nî çekan ra teyîne şarê Rojava nêdano. Bi taybetiye PDK omidê xo AKP ra giredayî bî. Serestîsanê DAÎŞ ra tepiya sermiyanê PDK bervayî da zoniyanê xoro û vat “Tirkiya marê yardim nêkerd.” Ma hukumatê AKP gonya kurdan ke bisimo, mird nêbeno, qe simarê yardim keno.
Heto bîn ra birayê ma yê tirk kî bêvengî yê. Ez şarê tirkî ra birayenî nêpîn, çike leto jede şarê tirkî kurdan de birayenî nêwazeno. La tayê şoreşgerê tirkî estê, înan ra çiye pîn. Hama hata ewro 2-3 sukan ra qederî înan ra kî vengê nêvejiya. Nî sukan de kî onca leto jede kurdî tewrê çalakiyan benê. Estemol, Îzmîr û taye sukanê bînan ra qederî Tirkiya raştkene de keso tirk xo nêlewneno.
Tam eksê naye eskerê tirkî Pîrsûs de vireniya kurdan ceno, bi gaz erzeno ser, keno dirvetin, şarê tirkî ra veng nêvejîno. Niya dewleta tirkî ebi şarê xora piya DAÎŞ rê yardim kenê. Şarê tirkî leto jede tam xeta hukumat û dewleta xo dero. Hedefê HDP gune şarê tirkî rêxistin kerdene biyenê, hama no hedef zaf durî oseno. Kurdî onca teyna rê. Ne şarê tirkî ne kî şoreşger û humanîstê tirkî kunê hereket.