REBAZ HESEN / ANF / SILÊMANÎ
Tecrîdo ke nizdîyê 19 serrî yo ke Rayberê Şarê Kurd Abdullah Ocalanî ser o yeno meşnayîş, dewam keno. Bitaybetî çend serrê peyênan de tecrîd hîna zaf ameyo girankerdiş û huqûqê mîyanneteweyî her roje yeno pelçiqnayîş.
Nizdîyê 2 serrî yo ke Girawa Îmrali ra ti xebere nîna girewtiş û na rewşe ver etirîyayîşê şarî her ke şono giranêr beno. Şarê kurd û dostê ci vera tecrîdî de bireaksîyon î; cok ra Kurdistan, Rojhelato Mîyanên, Ewropa û zaf cayanê dinya de payan ser de yî û seba weşî, ewleyî û azadîya Ocalanî çalakîyan virazenî.
Babete ser o kesê ke Başûrê Kurdistanî de manenî, reaksîyon nîşan dayî. Alimê Dînî Nadîr Alîyî va ‘bi nê tecrîdî hewl danî waştişê bawerî, îrade û azadîya şarê kurdî bişiknî’ û wina dewam kerd: “2 serrî yo ke tecrîdêko giran esto. Ti kes nêşêno pêvînayîş bikero. Ma nêzanî Rayber Ocalan cuyeno an nê. Ocalan tena rayberê şarêkî nîyo, fîlozofê donemê ma yo. Wextê ma de merdimo ke tewr zaf problemanê merdimîye reyde eleqeder bîyo yo. Rojhelato Mîyanên de wayîrê projeya çareserî yo. Tena o projeya pîyacuyayîşî pêşkêş keno. Yê ke tecrîdî domnenî, nêwazenî aştîye pê bêro.”
Ganî herkes vera tecrîdî de bivindero
Mama Şiwano Başûrê Kurdistanîyî zî bale ant çîyê ke bêrî kerdiş ser û wina va: “Azadîya Ocalanî azadîya çar parçeyê Kurdistanî û azadîya heme şaranê bindestan a. Birêz Ocalan 19 serrî yo ke tena sereyê xo zîndan de binê tecrîdî de maneno. Na rewşe vera çimanê heme dinya de bena. Kesê ke azadî, seyyewbînanî û biratîye wazenî, ganî heme vera tecrîdî de bivinderî. Lazim o heme hetê sîyasîyî, partî û rêxistinî vera na rewşe de bivinderî. Birêz Ocalan tena rayberê kurdan nîyo, eynî wext de rayberê heme bindest û şarê ke binê dagîrkerîye de cuyenî yo. Vera tecrîdî de bêvengmendiş, merdimîye ra vejîyayîş o.”
Dezgeyê mîyanneteweyî zî ortaxê sucî bîyî
Mamoste Aso Mihemmedo ke eslê xo de Başûrê Kurdistanî ra yo zî wina va: “Tecrîd goreyê ti qeyde û qanûnanê unîversalan nîyo. Ma heme dezgeyanê mîyanneteweyî, rêxistinê heqê merdimîye û sewbîna ke bêveng manenî dawetê wezîfeyê înan kenî û wa vera tecrîdî de sucê bêvengmendişî nêkerî. Sey şar û welatî rayberêkê ma esto, o zî destê dewleta tirkî de binê tecrîdêko giran de yo. Hetê herkesî ra yeno zanayîş ke Birêz Ocalan rayberê ma yo.”