TOPRAK EREN / ANF/BEHDÎNAN
15ê Tebaxa 2000î de teyarayanê şerî yê artêşa Tirkî hêrişê qezaya Kendakola ya Xakurkê kerd û netîceyê ci de 11 domanî û 13 cînîyî zî tede 42 sivîlî ameyî qetilkerdene. Vizêr serrgêra 19. ya qetlîyamî bî labelê qetilkaran hesab nêda û ewro şarê Kendakola qirkerdişêkê neweyî reyde têrî yo.
Heta nika derheqê qetlîyamî de ne dewayêk ne zî tehqîqatêk nêameyo akerdene. Bêvengîya qirkerdişê Kendakola qirkerdişanê Kortek û Roboskî rê bi zemîn û vernîya qirkerdişanê neweyan ê dewleta Tirkî akerde.
Şahidanê qirkerdişî ra Weysî Reşoyî va ‘keyeyê ma ewro reyna yenê bombardûmankerdene’ û wina domna: “Ez veng dana hukmatanê Başûr û Iraqî wa hetkarîya xo ya dagîrkerîye biqedênê. Problem PKK nêyo, wazenê ke Kurdîstan dagîr bikerê. Ê se kenê wa bikerê ma erdê xo canêverdenê.”
Ganî hêzê Tirkî herra ma ra vejîyê
Kurdoyo ke qirkerdişê Kendakola de xeylî merdimê xo vînî kerdî, vist vîrî ke ewro heman tehluke dewam keno û wina va: “Ez bêvengîya îdareyê Başûrê Kurdîstanî fam nêkena. Wazenê ke ma erdê xo ra vejîyê. Dewleta Tirkî ameya koyanê ma dagîr kerdê. Ganî hêzê Tirkî herra ma ra vejîyê. Waştişê dewleta Tirkî Koyê Şekîf û çend koyî nê, dagîrkerdişê heme Kurdîstanî yo.”
Ewro qirkerdişê neweyî benê
Kumrî Xelefa ke qirkerdişê Kendakola de lajê xo pîya bi cinî û di domananê xo vînî kerdî, bale ante bêvêngîya hukmatê Başûrî ya vera qirkerdişê Kendakola de ser û wina va: “Seba ke qetilkaran ra hesab nêame persayene ewro qirkerdişê neweyî benê. Wa her kes naye hol bizano ke ma vera zulmî de milê xo çewt nêkenê. Homa hêzê bido gerîlayanê ke ewro Xakurkê de bi gan û gonîya xo herra xo pawenê.”