Cinîyê ke herêma Botanî de cuyenî bi serran raştê koçê mecbûrî ameyî. Cinîyê ke herêma Botanî nêteriknayî tim muhîmîya cuya dewe anî ziwan. Nê cinîyan ra yewe zî Durîye Zirige ya 68 serreyî ya.
Durîye Zirige bi hawayo mecbûrî 23 serrî verê koçê Cizîrî kerdbîye û dima ra hesretîya dewa xo ver nêşîna Cizîr de bivindera û agêraye dewa xo. Babete ser o Zirige qisey kerde. Zirige qiseykerdişê xo de va ‘23 serrî ez bi hawayo mecbûrî seba domananê xo û problemê weşîye bajar de menda’ û wina dewam kerde: “Labelê mîyanê demî de ez zaf eciz bîya. Ma bajar de duyê wesayîtan û hewaya lêmine ver her roje nêweşxane de bîy. Kesê ke bi zorî vera ma daybî cuya bajarî de mi qerar girewt ke ez biagêra dewa xo. Ganî ma vera nînan de cuya xo newe ra awan bikerî.”
Heme çî bexçe de esto
Zirige senî ke agêrena dewa xo dest bi awankerdişê bexçeyê xo kena. Zirige dewamê qiseykerdişê xo de wina va: “Senî ke mi dest da herre ro mi xo biweşî û huzirin hîs kerd. Nika bexçeyê mi de himro, xoxe, mişmiş, çîleg, hêjîr, engûr, dirik û erûgî estî. Reyna sebzeyan ra zî firingî, îsot, pîyazo tern, xiyar û balcanî estî. Herre mi rê zaf comerd a. Ez çi rona qebul kena. Ez cuya dewe ra zaf bextewar a, ganî heme kesê ke koç kerdî, biagêrî erdanê xo ser.”
ŞIRNEX