KENAN KIRKAYA/DÎHABER/ANQARA
Ewro rewşêka Tirkîya tede ya de lazimîya bi îttîfaq û têkoşînêko ortax esto û hema vaje zafaneyê Tirkîya no het de eynî fikir de yî. Labelê no îttîfaq û têkoşîno ortax do senî bibo, no het de munaqeşe û fikrê cîyayî estî. Wexto ke îttîfaq û têkoşîno ortax yeno vatiş, elewîyî yenî vîrê merdimî.
Elewîyî heta nika têkoşînê demokrasî de xeylê bedelê muhîmî dayî. Babete ser o Serekê Federasyonê Elewî Bektaşîyan Muhîttîn Yildizî qisey kerd.
Yildizî bale ant lazimîya demokrasî û edaletî ser û wina va: “Cayo ke edalet û demokrasî nêbo, ewja de zulm û qetlîyamî estî. Ganî kesê ke edalet, huqûq û heq gêrenî, bê şert û şurt hetê yewbînan de bibî. Ma do îttîfaqan awan bikerî û cepheyê demokrasî gird bikerî. Eke çalakîya kurd, elewî û sosyalîstan înan eciz keno, ganî no cephe têkoşînê xo hîna zaf gird bikero. Lazim o ma wina bikerî ke dewlete û AKPyo tekperest bitersî.”
Komelî ardî dûştê yewbînan
Yildizî dewamê qiseykerdişê xo de qala awan nêbîyayîşê îttîfaqî kerd û wina va: “Seba ke dewlete heta nika komelî ard dûştê yewbînan, heta nika îttîfaq nêame awankerdiş. Elewîyî eşkenî awankerdişê nê îttîfaqî de rayberî bikerî. Ma her tim vengdayîşê ‘fikir, bawerî û cuya ci çi beno wa bibo, yê ke raştê cîyakarî yenî, ganî têhet de bibî. Ma dezgeyê elewîyan tim îttîfaqî rê akerde yî, çimkî Kerbela ra nata ma raştê zulmî yenî labelê ma nêtersenî. Yê ke fikrê înan tekperest o, mîyanê ma de cayê înan çin o.”
Yildizî peynîya qiseykerdişê xo de wina va: “Eke ma îttîfaqî awan nêkerî, do dîktatorî her ke şêro hîna zaf bihêz bibo. Cayê ke edalet nêbo, ewja de demokrasî zî nêbena. Cayê ke her di nêbî, ewja de dîktatorî, zulm û qetlîyamî benî. Ganî heme mazlumî bêrî têhet û nê qetlîyaman bivindarnî.”