3amnona peyêne(tebaxe) 2014 de gonewerê IŞÎDan, poşta tayê kolonyalîstan ra waşt ke Şengalî de êzîdîyan rê jênosîd bivirazê. Guman çîn o ke bextê êzîdîyan û Dêrsimîjan zaf şîyo ro jubînî. Çîyo ke IŞÎD viraşt, dewlete kî 1937-38î de sarê Dêrsimî rê viraştîbî.
Dêrsim de mazlumê ke jenosîd ra xeleşîyayîbî, remayîbî binê perranê Munzurî. Par Şengalîjan kî(zî) xo eşt virara koyê Şêngalî. Hurdêmîna cawan de kamî ke peyde mendî, ê ki sanitî qerqesunan ver. Hurdêmîna cawan de anor û şêrefê qoman waregino deyin; pê cênîkan kaykerd(tecavuz), domanî sungi kerdî, hêrdisa kokiman vêsne û hard de kaskerdî. Vengê însananê hurdêmîna cawan kî gosê dîna nêresa!
Tayê belqa(belkîya) pers kenê ke goneweran na zulim ça no ro? Hurdêmîna ca de kî cavê(cuwabê) xo ju(yew) yo. Çike Dêrsimîjî û Şengalîjî hetê kamîye û îtîqatî ra, dewletan ra zobîna cawan de bîyê. Dêrsim de alewî(wayîrê Raa Heqî), Şengal de êzîdî bîbî. Goreyê dewletan; gereke her(heme) kes sunnî-misliman bo. Na sevet(semed) ra teyna waxtê Osmanî de bîla 11 rey hêrişê Dêrsimî ser kerdo. Çi hêfo ke êzîdîyan kî serba îtîqatê xo 73 rey jênosîdan rê maruz mendê.
Hata jênosîdo peynîye, jêde Dêrsimîjan êzîdîyan ser çîyê nêzanitêne. Înternet, rojnameyan û televîzyonan de, xeberê jênosîdan ra dima(badê) hona bî xeberdar. Guman(şik) çîn o ke alewîyên û êzîdîyên jubînî rê zaf îtîqatê nejdî yê. Êzîdîyî ewro jê(sey) alewîyê kirmancan, hem hetê cuya(weşîya) xo ramitene hem kî hetê zon û zagonî zaf tengîye der ê. Na sevet ra gereke (ganî) raver sarê Dêrsimî êzîdîyan rê poşt bivejîyê. Tayê Dêrsimîjan, zerê adir de û toldê koyan de, kilama xoserîye vanê û heserê haştîye der ê, hama(labelê) tayê kî hona tanya adirî de nîyadoxê cinawuranê. Tayê dewletan, rojhelatê mîyanên de jê sewsewuke wazenê ke omidê kurdan, alewîyan û êzîdîyan bisimê. Wazenê ke Peymaneya Kasr-i Şîrîne ra hata nika çitur ke amo, oncîya hen çîkayişê domananê xo rê û hêsirê dayikanê xo rê nîyadox bimanîme.
Ewro gereke alewîyî û kurdî bizanê ke IŞÎD çimê ma de teyna kayê kolonyalîstan nîyo. Nê raver dismenê cênîyanê. Mordemê(merdimê) ke wazenê, cênî çê ra mevejîyê, kuçeyan de mefetelîyê, rasteyan ra bioncîyê aqlê înan ra kî qewete cênê. Dewlete şîndoranê xo ke nînan rê kerd ra, teyna sucê însanîye nêkerd, hetê ra kî cênîkan rê dismenên kerde. Na sevet ra ewro şorişê Rojava, teyna şorişê xoserîye nîyo. Belqa ney ra kî jêde; şorişê cênîkan o. Rojava de her kes bî şahid ke zefer rew bo herey bo ê qomanê mazluman o. Nê qoman, Tirkîya û Surîya de; kurd û alewî, Iraq de; kurd û êzîdî yê, hama nînan ra kî nêqedînê. Çike endî şêran tarîxê xo nusnenê ke tarîx, merxasêna saydaran menusno!