Xespkerdişê şaredarîyanê Amed, Wan û Mêrdînî ra dima meclîsê şaredarîyan zî ameybî betalkerdene. Walîyê Wanî Mehmet Emîn Bîlmezo ke Şaredarîya Wanî xesp kerd, Ulker Cem Kaplano ke bi karanê xo yê lêminan yeno zanayene, kerdbi mudirê VASKÎ.
Vervatoxê Meclîsê Şaredarîya Bajarê Girdî ya Wanî Cemîl Komîyî babete ser o qisey kerd. Komîyî vist vîrî ke 19ê Tebaxe de roja ke Meclîsê Şaredarîya Girdî do kombîyayîş biviraştêne, qayûm ame tayînkerdene û wina va: “Pêro pîya 71 encumenî estbî û 24ê înan ê AKPyî bîy. Meclîsê ma ame betalkerdene û selahîyet dewrê grûbêka encumenan bi. Na grûbe de Walîyo xespkar Bîlmez, 5 encumenî û 5 brokratî ca gênê. Nê hesab nêdanê şarî. Karê înan mal û milkê şaredarîye paştgêranê xo rê pêşkêşkerdiş o. Karê qayûmê verênî yê ke nîmcet mendbî înan domnenê.”
Komîyî va ‘Ma meclîs de bi rojan munaqeşe kerdene wina qerar girewtêne’ û wina dewam kerd: “Xora meclîsî heme hetan temsîl kerdêne. Meclîs hemşaredaranê ma ra zafêr bihêz bi. Nika peyê beranê padayeyan de qerarê bi keyfî yenê girewtene û bicaardene. Meclîs hetê şarî ra amebi dîyarkerdene û rolêkê ci yo muhîm estbi. La nika fonksîyonêkê ci nêmend. Xora ma verê cû zî dî ke senî qerarê xelet û bêhuqûqîyî ameyêne girewtene. Ceribnayîşê xelatan ra çîyêko raşt nêvejîyeno. Ma biheq ê û ma do miheqeq ser bikewê.”
ANF / WAN