Bi nameyê Yakûp Yazarî de keso ke qezaya Halîlîye ya Riha de karê sîgorta keno, heto bîn de dikanêk akerdo û ê dikanî de zî kare entîkroşîye keno. Dikanê Yazarî de qutîyê mucewheratî, gramafonî, plakcinitoxî, radyoyê kehenî, çaqmaqê maseyan, gazê lambeyan, saetî û sewbîna xeylê çîyî estî.
Yazar dîyar keno ke o bi goşdarîkerdişê plakan dest bi nê karî kerdo û wina domneno: “Ez no kar de madîyat ra zafêr hetê manewîyatî ra zewq gêna. Wexto ke mi plakî goşdarî kerdî, zaf keyfê mi ame û mi dest bi arêdayîşê plakan kerd. Ez hewl dana merdiman ra vaja ke ruhê entîkayan esto.”
Yazar vano ‘dikan de tewr zaf gramofonî eleqe vînenî’ û wina dewam keno: “Tewr zaf wendekarê unîversîte eleqe nîşanê entîkayan danî. Averşîyayîşê teknolojîyî ver, çîyê ke bi keda destan yenî viraştene vînî benî. Riha de tamîrkarê gramofonî çin o. Wexto ke mi dest bi nê karî kerd, xeylê kesî ameyî hetê mi. Nika plakê kerrayinî nînî viraştene, eke ma bişînbî înan bipawî, do baş bibo. Ewro zafaneyê kesan seba populerîte vera xo danî entîkayan, labelê no şaş o. Entîka bi xo sey behrî yo.”
Zextan ver plakî çin bîyî
Yazar plakê Mahmût Kizilî ke serra 1940î de hetê Şîrketê Palan Doken Plakî ra amebî viraştene nîşan dano û wina vano: “Êdî çi heyf ke plakê Kurdî çin î. Zextanê dewlete ver nê plakî çin bîyî. Bêxera plakcinitoxan çîyê bînî yew zî bi cereyanî nêxebetîyenî. Ganî merdimî qîmet bidî kel-melanê kehenan û înan nêerzî.”