Hemşaredarê Dersim Mehmet Alî Bûlî ser nameyê Komîteyê Hadreyîn yê Festîvalî qisey kerd û hayr ant polîtîkayanê çinîkerdişê Dersim ser. Bûlî vist vîrî ke festîval dûştê polîtîkayanê bêmordemîkerdin de virazenê û aşkere kerd ke festîval dûştê polîtîkayanê asîmîlasyon, qirkerdinê xoza, kultur û îtiqatî tewrekê topyekun o.
Vindertişê Sey Riza û Huseyînan
Peycoy bi nameyê ‘Erjîyayenê Hometî yê Dersim’ sohbetekê virazîya. Ocaxê Bawa Mansûrî ra Pîr Seyfî Mûxûndi lawika Destanê Dersim 37-38 wend. Ocaxê Derwîş Cemalî ra Menşûre Dogan ke panelî de qisey kerd Raya Haqî de behsê cenîyan kerd. Dogan vist vîrî ke tarîx ra na het xêlê zilim vînayê û va, neyra tepya ma dê zilim nêvînê. Serva nayî zî ganî îtiqatê xo bidime ciwîyayen. Menşûre Dogan aşkere kerd ke dûştê kesê ke wazenê îtiqatê alewî û kulturê ci çinî bikerê ganî zey vindertişê Sey Riza û Huseyînî bîro damusnayen. Dogan vist vîrî ke rixmê zilmo ke vînenê cenî seweta vindernayişê herbî tekoşîn kenê û nîya va: “Zilim û herbî sifte da cenîyan ro. Rixmê nayî cenîyan îtiqatê xo kirêşt nê rozan. Yê ke cenîyan ra zilm kerdî bi xo zilm dî.”
Heqîqet wextê nikayîn o
Pîranê Ocaxê Seyîd Seyfettîn ra Pîr Hasan Sonmezî kî derheqê heqîqat û zabîyena heqîqatî de qisey kerd û da zonayen ke heqîqet wexto ke mordem ci de weşî keno yo. Sonmezî aşkere kerd ke heqîqeta şîyayiş û ameyişê ma esta û va, dinya de xêlê çî vûrnîya la îtiqat nêvûrnîya.” Ocaxê Pîrî Sevdîn ra Pîr Riza Katûrmanî zî hayr ant tarîxê Dersim ser û va: “Wexto ke vanê Dersim tertelê ke tarîxê Dersim de amey ciwîyayen yenê vîrî. Ser qetlîaman ra 70-80 serrî vêrdî ra, la sarê Dersim zon, îtiqat û kulturê xo vindî nêkerd, ard na roz.”
Peycoy zî bi vîrardenê Ayten Ozturk ke verîya 24 serran Meydanê Sey Riza ra bi Torosanê Spî amê remnayen û hetê azayê JİTEM Mahmût Yildirimî bi îşkence amê kişten film ame damûsnayen. Vizêr kî çarçoveyê bernameyî de belgesel ame temaşekerden û zîyaretî virazîyayî.
DÎHA/DERSIM