HÎVDA HEBÛN / REQQA
Şerwanê YPGyî yê bi nameyê Ezed Mihemed Ehmed ciwanêkê kurdî yo. Wexto ke 2013 de Reqqa ra vejîyenî, o 15 serreyî yo. Zaf wazeno beşdarê YPGyî bibo, labelê o wext seba ke emrê ci şenik o, nîno qebulkerdiş.
Hetê keyeyê xo ra erşawîyeno Tirkîya, labelê ewja de ancax eşkeno 5 aşmî bivindero. Babete ser o Ehmedî qisey kerd û derheqê çîyê ke cuyaybî de melumatî pare kerdî.
Ehmedî va ‘2013 de OSO ra dima DAIŞ kewt Reqqa û heme kurdan dişmen îlan kerd’ û wina dewam kerd: “Ma zî mecbûr mendî ke bivejyî û ma şîyî Kobanê. Mi ewja de zaf waşt ke beşdarê YPGyî biba, seba ke emrê mi şenik bî, keyeyê mi qebul nêkerd û mi erşawitî Tirkîya. Ez tena 5 aşmî Tirkîya de menda û agêraya warê xo. Se beno wa bibo, ganî ti kes welatê xo nêterikno. Wexto ke ez bîya 18 serreyî, ez beşdarê YPGyî bîya.
Ez wazena biagêra erdê xo
Ehmedî qiseykerdişê xo de qala çîyê ke cuyaybî, kerd û wina va: “Rojêk ma aver şîyêne û ma tayê sîvîlî dî. Mabênê ma de 50-100 metre estbî. Ma înan ra va ‘ver bi ma bêrê’labelê sîvîlan bi hawayo bêveng ma ra ewnîyayênê. Ma va qey ma ra tersenî, cok ra wina kenî. Wexto ke ma nizdîyê înan bîyî, ma dî ke tayê bi hawayo nimite ma ra vanî, meyrê. Ma fam kerd ke înan dame ronaya. Wexto ke DAIŞîyan dî, dest bi hêrişî kerdî, labelê embazêkî ma xo eşt aver û şer dest pêkerd. Ma netîceyê pêrodayîşî de heme sîvîlî xelisnayî, labelê 2 embazê ma zî şehîd bîyî. Ez wazena hemleya Reqqa ra dima biagêra erdê xo.”