Projeyo ke hetê Şaredarîya Beyoglu û Grûba Çalikî ra semtê Tarlabaşi ya Stenbolî de bin nameyê ‘vurîyayîşê bajarî’ de yeno meşnayîş, hetê Mehkemeya Îdareyî ya 3. ya Stenbolî ra ame betalkerdiş. Na doze hetê Odeyê Mîmaran yê Şûbeya Stenbolî ra ameybî akerdiş.
Babete ser o Avûkatê Odeyê Mîmaran Can Atalayî qisey kerd. Atalayî va ‘na doze 2007 de ameybî akerdiş û no qerar, qerarêko erey ameyo dayîş o’ û wina dewam kerd: “Proje ver merdimî semtî ra ameyî erşawitiş û awanîyî ameyî vengkerdiş. Ewja de bi hawayo zorî tehlîye virazîya. Mehkemeye nînan ser o nêvindete. Rewşa ke ewja de ameye cuyayîş, koçkerdiş o. Kesê ke nê operasyonî domnenî, heme zî sucdar î. Nê ewro nêbo zî siba do bêrî cezakerdiş. Şîrketêk heme îmkanê dewlete girewto pey xo û Tarlabaşi de kurd, LGBT, feqîr û sewbîna hetan tersine o. "
MA/STENBOL