LALEŞ RÊNAS / SARYA XWÎNDA / ANF / BEHDÎNAN
Gerîlayanê YJA Starî û HPG’yî koyanê azadan ê Kurdistanî de derheqê 8’ê Adare Roja Cinîyan ê Kedkaran ê Dinya de qisey kerd.
Gerîlaya YJA Starî Bahar Zagrose: 8’ê Adare a roj a ke cinîyan îradeyê xo ramoto. Seba ma rojêk tena çinya, rojî heme yê cinîyan ê. Mucadele û xoverdayîşê cinîyan roja ke dest pêkerda ra heta nika şexsê Leyla Guvene de dewam keno. Gureyê ma pêrune no yo ke ma nê xoverdayîşî rê wayîr vejîyê û bidê dewamkerdene. Na yewe heman wextî de mucadeleyê xobîyayîşî yê cinî yo. Ma 8’ê Adare Rayberê xo rê û şexsê cinîyan ê xoverdayoxan de heme cinîyan rê pîroz kenê. Cinîyî do bi xoverdayîşê xo tecrîdê serê Rayberîye biqedînê.
‘Cinîyî çiqas azad bibê do camêrdî zî hende azad bibê’
Gerîlayê HPG’yî Şoreş Andok: Cinîyî çiqas azad bibê do camêrdî zî hende azad bibê. Çunke têgêrayîşê ma cinî sey hêzo serkêş vînena. Eke mucadeleyê cinîyan ewro dinya de vila beno no saya Rayberîye de yo. Saya Rayberîye û şehîdanê ma de yo. Rayberê ma ewro tecrîdkerde yo û cinîyî bi estbîyayîşê xo hemverê tecrîdî de mucadele danê. Vana ‘Rayberîye temsîlkarê estbîyayîşê min o.’ Gama ke embaze Sema çalakîya fedayîye kerde, embaz Fîkrî Baygeldîyî na yewe xo rê sey fermanêk qebûl kerde û çalakî viraşte. Nika zî dimayê Leyla Guvene ra Nasir Yagizî dest bi grevê vêşanîye kerd. No yew qezencê cinîyan o.
‘Cinîyî serkêşîye kenê’
Gerîlaya YJA Starî Şîlan Kobanê: 8’ê Adar a 2019’î seba cinîyan ê Kurdan wayîrê cayêkê taybetî yo. Cinîyî prosesê xoverdayîşî rê serkêşîye kenê. Ma nika zî seba heqanê cinîyan mucadele danê. Leyla Guvene bi xoverdayîşê xo sembolê cinîya azad a. Xoverdayîşê aye her ca de vila bîyo. Ma, YJA Star do xoverdayîşî bidomno. Emser do bibo serra azadîya Rayber Apoyî.
‘Nameyê PKK’yî û xoverdayîş her tim bîyo yew’
Gerîlayê HPG’yî Sîpan Serhat: Xoverdayîşê seba qedînayîşê tecrîdkerdişê Rayberîye ke bi serkêşîya Leyla Guvene dest pêkerd, hetê Nasir Yagizî ra ame dewam kerdene. Seba qedîyayîşê tecrîdî înan bedenê xo da verê mergî. Nameyê PKK’yî û xoverdayîş her tim bîyo yew.