Azayê Kongreyê Îslama Demokratîk û Serokê Komeleya DÎAYDER yê Şûbeyê Stenbol Mele Ekrem Baranî vist vîrî ke Hz. Muhammedî hadîsanê xo de însanan dawetê haştî kerd û aşkere kerd ke Tirkîye de zî haştî bi Ocalan yeno. Mele Ekrem Baranî da zonayen ke mavêna şaran de herb çinyo û hayr ant vengdayişê Ocalanî ser. Baranî aşkere kerd ke eke herb dewam bikero xetê fayî hona vêşî abenê. Nayî ra ganî herkes paşt bido vengdayişê Ocalanî. Ma hikûmet dawet kenê ke cewab bido gama haştî ke Ocalanî eşta.
Dewlet herbî xorîn kena
Serokê Federasyonê Alewî Bektaşî Bakî Duzgunî zî vengdayişê Ocalanî ca de dî û va: “Cenaze şinê her cayê welatî. Ma cepheyo ke wazeno cenaze şirê de nîyê. Ma bi haştîyane pîya ciwîyayişê şaran het de yê.”
Duzgunî da zonayen ke qedînayişê herbî bi hewldayenê jû hetî nêbeno û aşkere kerd ke dewlet nika herbî xorîn kena. Bakî Duzgunî da zonayen ke şarê kurd û çormeyanê sosyalîst her tim seba haştî tekoşîn da û aşkere kerd ke 7ê Hezîran ra tepya xerb bi xorîn.
Serokê Komeleyê Alewîyê Demokratîk Bulent Felekoglû zî vist vîrî ke Ocalan hetê şaranê Tirkîye û Rojhelatê Mîyanî zey îrade yeno vînayen û wina va: “Vengdayişê Ocalanî zaf muhîm ê. Ser nameyê şaranê Tirkîye Birêz Ocalanî reyna bîn damûsna ke çi qe hesas o.” Felekoglû vist vîrî ke Tirkîye kirêşîyena xorînîya herbî û va Ocalan aktorê haştî yo, ganî dewlet goreyê nayî pozîsyon bigîro.
DÎHA/STENBOL