Çadirê ke şar seba ke ca û warê xo veranêdo, tede mendêne hetê polîsan ra ameyî veşnayîş û hêzê dewlete hewl dayî bi no hawa şarî bidî koçkerdiş. Wekîla HDPyî ya Şirnexe Leyla Bîrlîke babete ser o qisey kerde.
Bîrlîke qiseykerdişê xo de bale ante ser serranê 90î û qiseykerdişê xo wina domnaye: “Dewlete waştêne ke Şirnexî veng bikera û fikrê dewlete yê vera kurdan de nêbedilîyayo. Ewro hêrişê dewlete yê vera kurdan bi xoverdayîşî pûç bîyî. Hedefê înan yê nika zî vengkerdiş û bêmerdim veradayîşê Şirnexî yo. Wazenî şarê Şirnexî bidî koçkerdiş û ser bajaranê Tirkîya de vila bikerî. Şarê Botanî no yew serre yo ke vera hêrişan de payan ser de yo. Nê xoverdayîşî AKP û Serekomar Erdogan de hêrsê çinkerdişî awan kerdo.”
Erdogan bi hîsanê nefretî hêrişê şarê Şirnexî keno
Bîrlîke dewamê qiseykerdişê xo de va çadirê ke qezaya Şirnexî Dêrgulê de ameybî ronayîş, dewamê xoverdayîşê şarê Şirnexî yo û wina dewam kerde: “Çadiran de xoverdayîşê şarê Şirnexî domîyeno û tehemulê xoverdayîşî nêkenî. Nika seba ke Şirnex bikerî qeza, nîqaşî yenî kerdiş. Herçiqas ke parlamento de nêmayo qebûlkerdiş zî na babete nêqedîyaya. Xoverdayîş vernîya nîqaşan girewt. Wexto ke Erdogan Serra 2009 û 2010 de ame Şirnex, şar bi pêroyî reaksîyon nîşanê ci da. Nê semedî ra Erdoganî vatbî ‘o do nê reaksîyonî xo vîra nêkero’ û ewro hêrişê şarê Şirnexî keno.”
Şirnexîjî dê cuya neweye ronê
Bîrlîke peynîya qiseykerdişê xo de va bi vernîgirewtişê sîyasetî wazenî qetlîyamêko gird bikerî û wina qedêna: “Hemserekê Meclîsê Şarî yê Şirnexî Mehmet Tunçî vatbî ‘Ma heta nika sere nêrona û ma do nêronî zî’. Şarê Şirnexî û heme şarê Kurdistanî pey nê vatişan de yî. Ti nîyetê şarê Cizîr, Hezex û Şirnexî çin o ke xoverdayîşî ra fek verabido. Seba ke şar bi qerar o hukmat har beno. Şar vera projeya TOKÎye de zelal o û eke bêkeye zî bimano, nêdekeweno ê keyeyan. Hukmat na proje de teng bîyo û nêşkeno xo bilebitno. Ma bi xo zî nizdî de keyeyî herînaybî, la şar va ‘ma do tîya ra nêşêrî.’ Şarê Şirnexî do wehşeto ke ser ci de bîyo xo vîra nêkero.”
ŞIRNEX