Vernîya heme çî de ez spasîya xo heme kesanê ke bi min bawer bîyê ke ez ko bieşkî barêke newînî wedarî rê kena.
Lazim o ke ma kesê ke ameyê ramoştişî verê her çî lehenganê axa xo nêkerê xo vîr ra û heqê ked û guna ke înan semedê şarê xo rayîrê demokrasî û azadî de rişnaya bidê û heme kerdişanê xo mîyanê aye çarçiwa de rayîra berê.
Gereke ayê ke endamî de ameyê ramoştişî, ayê ke verendamî rê xo dabi ro û şarê ma yê dilxwazî bi rihê sefreberî bixebetyê.
Ne mafê endamanêke rêze peyîne de yê û ne zî yê verendamanê ke nêameyê ramoştişî esto ke xo xebata weçînayîşî ra dûrî bidê. Eyro roc ma rê xebatêka weçînayîşî ya bi rihêke seferberî lazim a ke ti berjewendîyêke tede ca nêvînena.
Gereke eksenê ma de bêwatekerdişê bendawe bibo û ma bi rihê ardişê azadî, aştî, demokrasî û cuyînêke newe şarê xo rê bîyarê bixebetiyê.
Ancî ayêke bêrê weçînayîşî gereke nirxê qîmetê ke hetê şarê înan ra înan rê ameyo dayîşî bizanê, polîtîka û siyasetêke eksenê nehfîya şarê xo de biramnê û şehîdê ay rayîrî Wedat Aydin û Mehmet Sîncarî ra bigî heta şehîdanê bê nameyan ke binê sîyan (kerreyan) û leman de canê xo dayo bîyarê xo vîr û goreyê ay ra meclise de xebata xo verdewam bikerê.
Lazim o ke derdê endamanê ke bêrê weçînayîşî ne qoltixî bê ne zî pereyê bî. Gereke derdê înan şarê xo rê ardişê cuyînêke newe û demokratîk bo.
Gereke derdê înan wedartişê qanûnanê ke hemverê merdimahîyê bo.
Derdê înan gereke ardişê têduştîyî û aştîyêke mendî ya mîyanberê kurd û tirkan de bo. Gereke derdê înan mîyanberê merdiman ra wedartişê ferqê sinifan û ardişê têduştîya ziwanî, bawerî û zayendî bo.
Helbet welatêke zey Tirkiye de karê siyaset û polîtîka rehet nîyo. Bi seyan dek û dolabî deyenê vernîya merdimî.
Partiyê ke îqtîdar de yê semedê ke desthilatîya xo verdewam bikerê çi kerdişê teberê hiqûqî û nêrayîrî de estê fînenê dewre.
La tecrubeyê şarê kurdî yê vîst serran virazyayo.
Eke ma bi stratejiyêke weçînayîşî ya baş e dest bi xebata xo bikerê ma ko bendawan sero bino bikerê.
Lazim o ma şûnde xebata weçînayîşî ya klasîke xebatêka bi ferqe û newî bidê destpêkerdişî û hetanî ke ma zerra yew bi yew, ferd bi ferd şarê xo nêgîrê ra ma boye nêdê xo.
Helbet ko lingêka ena xebate ya bîne cenî rûnê û eno awa zî ko reng û vengê xebata weçînayîşî zêde û weş bikero.
Ma ko bi fikrê ardişê cuyînêke newe, bi heme reng û venganê xo rayî ra şêrê û heta nêarsê armancanê xo ma ko nêvenderê. Eka ra heme xebatkaranê weçînayîşê rê û heme şarê ma rê serkewtiş.
Nesrin NAVDAR