Vera hêrişê dagîrkerîye yê dewleta Tirkî û çeteyanê ci de reaksîyonî her ke şono zêde benî. Bi seyan akademîsyen, roşnvîr, hunermend û entelektuelê ke welatanê cîya-cîyayan ra yî, keyepelê boycott-turkey.netî de ameyî têhet, dîyar kerd ke înan qerarê boykotkerdişê dezgehanê Tirkîya girewto.
Metno ke seba kampanya ameyo amadekerdene de bale ancîyayo neheqîyê ke Vakur û Rojhelatê Sûrîye de yenî kerdene ser. Ameyo vatene ke amancê hêrişan o yo ke herême de tayê bedilnayîşan bikero. Metin de qala vatişanê Tirkîya ameyo kerdene û beşdarvanan dîyar kerdo ke Tirkîya bi hawayo aşkere qala pakkerdişê nîjadê Kurdan kena û çîyê ke hetê Erdoganî ra yenî vatene raştîya xo de sucê şerî yî.
Metnê kampanya de veng dîyayo hetanê akademîkanê mîyanneteweyîyan û înan ra ameyo waştene ke wa vera dagîrkerîye de piştî bidî şarê Rojawanî. Ewil 160 akademîsyen, hunermend û entellektuelan metnê kampanya îmze kerdo. Nê kesan mîyan de kesê sey Prof. Noam Chomsky, John Holloway, Barry K. Gîlls, Chrîs Dîxon, John P. Clark, Hamît Bozarslan û sewbîna pêro pîya 160 kesî estî.
ANF/BRUKSEL