Qezaya Dersim Qisle de artêşa tirk 23ê Tebaxe de birranê Bezik bombevornayen kerd. Netîceyê bombevornayenî de 6 gerîlayanê HPG weşîya xo kerd vinî. 6 gerîlayan ra netîceyê DNA yê 5 gerîlayan aşkere bi. Malbatê ke şî Tiba Edlî yê Meletî cenazeyanê domananê xo girotî. Seba gerîla Recep Yetîş (Tufan Arjîn) qezaya Amed Hezro de, Murat Yalavaz (Mordem Amed) Licê de, Alî Ozalp (Dilgeş Sorpiyan) û Yuksel Gokbaş (Serhat Dersim) Dersim de, Dogan Aslan (Andok Meryem) qezaya Mûş Kop de merasîmê cenaze virazîyay. 

Ahmet Akdag (Adil Botan) ke eynî bombevornayenî de weşîya xo kerd vinî netîceyê testê DNA yê ci nêvejîyayî. Malbatê ke seba teşîsê cenazeyan şî aşkere kerdî ke cenazeyî rîwalê veş û îşkence nînê silasnayen.


Şehîdê şarî nêmirenê

Gerîlayan ra Recep Yetîş qezaya Amed Hezro dewa Gomê Dedaş de amê definkerden. Cenaze badê meydanê dew de ca ardişê wecîbeyanê dînî bi sloganê “Şehît nêmirenê” ser doşan de berdîya mezelxaneyê dew û defin bî. Badê definkerdişî Hemserokê MEYADER yê AMED Hasan Pençe ke merasîm de qisey kerd hayr ant êrişanê hikûmeta AKP û dewlet ser. Pençe vist vîrî ke AKP û Erdogan Kurdistan de şarî tehdît keno, wehşet rameno û va, şima koyanê ma birijnê zî, domananê ma bikişê zî nêşkenê no şarî biqedînê. Qabê  Yetîş dew de serweşî yenê qebulkerdiş.

Cenazeya gerîla Murat Yalavaz'ın (Mordem Amed)î zî rixmê pêrokîn hewldayenê manîkerdişî yê polîsan Mezeleyê Yenîkoy de defin bî. Bi seyan kesê ke cenaze vera mezelxane berdî çormeyê ci hetê polîsan ame giroten. La şêligî bi sloganê “Şehît nêmirenê” cenaze defin kerd. Hemserokê MEYADER Kasim Pervane ke merasîm de qisey kerd polîsan rê nêrazîbîne damûsna û va tekoşînê Yalavazî seba înan nimûneyê xoverdayişî yo. Birayê Murat Yalavazî Abdullah Yalavazî zî şarî rê berxodarîya xo kerd û aşkere kerd ke birayê ey tekoşînê serbestî da. Bira Yalavazî va destanê sermîyananê  dewlet de gonîya kurdan esta û va şehîdê şarê kurd nêmirenê. Badê merasîm şêlig bi sloganan mezelxane ra abirya. Zîyaretê serweşî Keyeyê Şînî yê Temîran de yenê qebûlkerden.


Aslan Kop de defin bi

Gerîlayan ra jew o ke bombevornayenî de weşîya xo kerd vinî Dogan Aslan (Andok Meryem) bi. Andok zî dewa xo de oxirê raywanîya peynî bi. Cenazeya Aslanî morgê nêweşxaneyê Elezîz ra amê giroten û şewa verî berdîya qezaya Mûş Kop. Cenaze vizêr seatanê şodir de hetê seyan welatijan amê pêşwazîkerdiş. Badê wecîyebanê dînî tirbê Aslanî reyna peynî berdîya keyeyo ke ame dinya û bi gird. Peycoy şêligî waşt cenaze biberê mezelxaneyê dew. La polîsan bi wesayîtanê zirxî vernîya welatijan girot  û dest nay posterê Aslanî ser ro. Ser nay tengî vejîya, welatijan polîsan rê nêrazîbîyen damûsna. Welatijan cenaze ser doşan de berd mezelxaneyê dew û çormeyê ablûqeya polîsan de defin kerd. Badê merasîma cenaze şêlig seba serweşî şî xêma ke ver keyeyê malbata Aslanî de ronîya. 


Ozalp û Gokbaş Dersim de defin bî

Gerîlayê HPG Alî Ozalp (Dilgeş Sorpiyan) û Yuksel Gokbaş (Serhat Dersim) zî hetê seyan kesan Dersim de defin bi. Alî Ozalp qezaya Dersim Pêrteg dewa Sorpîyan de defin bi. Bi seyan kesan bi sloganê “Ey şehîd gonîya to erdî de nêmanena” cenaze ber mezelxaneyê dewî. 

Cenazeya Yuksel Gokbaşî zî qezaya Dersim Qisle dewa Geriş de defin bî. Bi seyan welatijan bi slogana “Şehîd hêmirenê” cenaze heta mezelxane berd û defin kerd.  Hurdî merasîman de zî lejkeran raya welatijan birna û waştî provakasyon vejerê. Welatijan no tewrê lejkeran rê nêrazîbîyen damûsna.  


DÎHA / NAVENDÊ XEBERAN