Merkezê Şêwirmendî yê Sûrî ke xizmetê sekreterya zî dano Platformê Pawitişê Mîyanê Sûrî de, bi tewrbîyena Hemserekê Şaredarîya Şaristanê Girdî yê Amedî Gultan Kişanake û Firat Anli Wekîla Hemşaredaranê Sûrî Azîze Deger Kutlu, Wekîlê Baroyê Amedî Ahmet Ozmen, Hetkarê Serekê Odeya Sanayî û Tîcaretî yê Amedî Metîn Aslan, Îdarekerê Komela Heqanê Merdiman û Komela Huqûnasanê Mezopotamya, temsîlkarê odeyê ke girêdayîyê TMMOBî yê û muxdaranê Mîyanê Sûrî kombîyayîş virazîya.
1277 awanîyî ameyê rijnayîş
Kombîyayîş bi qiseykerdişê Sereka Dayîreyê Turîzm û Mîrasê Kulturî Nevîn Soylukayaye dest pêkerd. Soylukayaye derheqê tarîxê Sûrî û prosesê UNESCOyî de zanayîş da. Soyukayaye dewamê qiseykerdişê xo de behsê qedexeyê tebervejîyayîşê kuçeyan o ke 6ê Êlula 2015 de dest pêkerdibî û xebata rijnayîşê Mîyanê Sûrî ke 10ê Adare ra nat dewam keno kerd û wina va “10ê Adara 2016 ra nat hema ke tespîtê rewşe nêameo kerdiş kepçe û makînayanê karî dest bi karê rijnayîşî kerdo. Goreyê planê îmarî hereket nêkenê. Rayîranê neweyan ê ke munasîp nîyê akenê û kuçeyen kenê hîra. ”
Soylukayaye îzah kerd ke Herêma Mîyanê Sûrî, Herêma Meydanê Mîrasê Dinya ya tampone ya, goreyê qanûnanê neteweyî û mîyanneteweyî xebata ke do seba Qelaya Amedî û Baxçeyanê Hewselî bêro kerdiş de ganî Îdareyê Raşteyê Peyzajî tede ca bigîro û wina va “La çi heyf ke ma taxîlê nê xebatan nêbîyê. Mîyanê Sûrî pêroyî de 148 donum o û 10 donumê ci pêro ameyo rijnayîş. Cayê ke yene rijnayîş pêro bene dûz. Goreyê fotografa ke aşma tebaxe de ameya antiş, 1277 awanîyî ameyê rijnayîş.”
Soylukayaye ra dima Hemserekê Şaredarîya Şaristanê Girdî Firat Anli zî yew qiseykrdiş kerd. Anliyî îzah kerd ke Mîyanê Sûrî Merkezê Şêwirmentî yê Mîyanê Sûrî eşkenê nika ra tepîya se bikerê ser o ameyê têhet û wina va “Xeylê keyeyî ke Mîyanê Sûrî ra koç kerdê la hema peyser nêameyê estê. Semedê keyeyanê ke Mîyanê Sûrî ra koç kerdê xebata sosyale û qanûnî şert a. Merkezê Şêwirmendî yê Mîyanê Sûrî de seba îxtîyacan do xebate nêbo. Xebata ardimkerdişî xora esta û dewam kena. Tîya de derheqê qanûnî û sosyalî de xizmetê şêwirmendî dîyeno keyeyan. ”
‘Ronayîşê Merkezê Şêwirmendî muhîm o’
Hemsereke Gultan Kişanake zî da zanayîş ke ronayîşê Merkezê Şêwirmendî yê Mîyanê Sûrî zaf muhîm o û wina va: “Her çiqas 6 taxan ra hemwelatîyê ma barê cayanê binan kerd zî ma zanê ke fikrê înan û qeydê înan tîya de yo, seba ke wa peyser bêrê Mîyanê Sûrî û kargehê ke tîya de yê û pêrodayîşan ver ameyê rijnayîş newe ra bêrê viraştiş ser o wazenê her tim ma de qisey bikerê. Semedo ke Merkezê Şêwirmendî yê Mîyanê Sûrî, Mîyanê Sûrî de yo semede hemwelatîyan zaf hol o. Merkezê Şêwirmendî do xizmetê sekreterya zî bido Platformê Pawitişê Mîyanê Sûrî. Ma sere ra nat vanê qerarê îstîmlakkerdişî raşt nîyo. Zerarê hemwelatîyan esto, la lazimo o ma pêro-pîya nê zerarî telafi bike. Xora ma nika nê sebebi ra ameyî têhet.”
AMED