Riza Zarrab doza ke Hetkarê Muduro kehen yê Halkbankî Mehmet Hakan Atîlla tede yeno mehkemekerdiş de şahidî keno. Doze 2 rojî dewam kerde û Zerrabî roja dîyine de senî ambargoyo ke hetê Amerîka ra vera Îranî de ronîyabî amebî wedarnayîş ser o qisey kerd.
Zarrabî verê cû senî ruşwet dabî Wezîrê Ekonomî yo kehen Zafer Çaglayanî vatbî. Zarrabî dima ra dîyar kerd ke yê ke tîcaretê Tirkîya û Îranî tesdîq kerdo Serekkomar Erdogan o û wina dewam kerd: “Mi o wext bi desan reyan ruşwet da Çaglayanî. Ma bê Çaglayanî kar nêkerdênê. Bankaya Zîraat û Vakifî zî waştênê Îranî reyde têkilî ronî. Serekwezîr Erdoganî seba na xebate tesdîq da. Tîcaretê altûnî de Serekwezîrê ê wextî Erdogan û Wezîrê Malîye Alî Babacanî tesdîq da.”
Zarrabî îfadeyê xo de sucê xo qebul kerd û ard ziwan ke o wextê tepiştişî de ameyo tehdîtkerdiş, cok ra nika kontrolê FBI de yo. Zarrabî wina dewam kerd: “Pereyê ke Hîndîstan de ameybî komkerdiş, do ser Halkbankî ra bişîyênê sewbîna bankaya tirkî rê û ewja ra zî bi mi hawayo altûn biantênê û bikerdêne pere û bidayênê înan. Zafer Çaglayanî bi desan reyan selahîyetdaranê Îranî reyde kombîyayîşî viraştî. Kombîyayîşan de selahîyetdaran waştênê ke wa Halkbank mabênkarî bikero.”
ANF/NEW YORK