2016 ra nata Rayberê Şarê Kurdî Abdullah Ocalanî ra ti xebere nîna girewtiş û seba ke şarî bimusnî bê Ocalanî heme çîyî yenî kerdiş. Na çarçewa de hepsîyo bi nameyê Mehmet Saît Yildirimo ke verê cû 9 rojî Girawa Îmrali de mendbi û dima ra nêweşîya qelbî ver erşawîybi zîndanêko bîn, nika bi talîmatê taybetî yê Wezaretê Edaletî surgunê Zîndanê Kiriklarî bi û girîyayo hucreyê yew kesî. 11ê Êlula 2016î ra nata ti xebere Rayberê Şarê Kurdî Abdullah Ocalan ra nîna girewtiş û no het de etirîyayîşê girdî estî. Polîtîkayê tecrîd û îzolasyonî tena Girawa Îmrali de nê, pêroyîya zîndananê Kurdistan û Tirkîya de yenî domnayîş. Ewro destûr nêdîyeno keye, avûkat û Heyetê Îmrali ra ti kes şêro Girawa Îmrali û Ocalanî reyde pêvînayîşan bikero. Heto bîn ra seba ke şarî bimusnî bê Ocalanî, no het de heme tewir çîyî yenî kerdiş. Seke yeno zanayîş 15ê Adara 2015î de bi nameyê Sekreteryaya Îmrali ameybî awankerdiş û 5 hepsîyî erşawîyaybî Girawa Îmrali. Nê hepsîyan ra yew zî Mehmet Saît Yildirim bi. Yildirim 9 rojî Girawa Îmrali de mendbi û dima ra nêweşîya ci ya qelbî ver, verê sewqê Zîndanê Bolu, dima ra sewqê Zîndanê Amedî û dima ra zî surgunê Zîndanê Odemîşî amebi kerdiş. Ame musayîş ke Mehmet Saît Yildirim tewr peynî Zîndanê Odemîşî ra surgunê Zîndanê Kiriklarî ameyo kerdiş û zîndan de erzîyayo hucreyê yew kesî. Seke yeno zanayîş Yildirim verê cû 9 rojî Girawa Îmrali de mendbi û dima ra Yildirimî kitabê bi nameyê ‘Îmrali de 9 rojî’ weşênabî û no kitab hetê weşanxaneyê Aramî ra amebi çapkerdiş. ‘Ma rewşa embazê xo ra etirîyenî’ Surgunbîyayîşê Yildirimî hetê hepsîyo bi nameyê Turgut Koyuncuyî ra bi faksêkî ame vatiş. Koyuncuyî faksê xo de wina vato: “Embazê ma Mehmet Saît Yildirim bi talîmatê taybetî yê Wezaretê Edaletî girîya hucreyê yew kesî. Seba ke bigirîyo hucreyê yew kesî, tîya ra erşawîyayo Zîndanê Kiriklarî yê Îzmîrî. Labelê seba girîyayîşê hucreyê yew kesî ti sebeb çinêbi. Yilidirim bi talîmatê Wezaretê Edaletî girîya hucreyî. Ti nimuneyê ci dinya de çin o. Na rewşêka newe ya, ma rewşa embazê xo ra etirîyenî.” Grevê hepsîyan roja 22. de yo Heto bîn ra nê zîndanê ke zext û tedayî tede domîyenî ra yew zî Zîndanê Tîpa Ryî yê Menemenî yo. Seke yeno zanayîş 4 hepsîyê bi nameyê Ergîn Aktaş, Yusuf Bulut, Dîcle Bozan û Ehmedê Xemî ke heqê tedawîya înan ame astengkerdiş, 20ê Nîsane de dest bi grevê vêşanîye kerdbî. Grevê vêşanîye roja 22. de dewam keno. Avûkatanê Komeleya Heqê Merdiman ya Şûbeya Îzmîrî Zafer Încînî derheqê rewşa hepsîyan de melumatî dayî. Încînî va ‘linga Bozanî tirakerde ya û loqleyê ci teber de yî’ û wina dewam kerd: “Rewşa ci baş nîyo û ganî bêro tedawîkerdiş. Seba ke rewşa înan baş nîya, nika ameyî dûştê tedawînêbîyayîşî. Vindetişê îdareyî ver hepsîyî grevê xo domnenî û heta ke rewşa înan baş nêbo, hepsîyî do grevê xo bidomnî.” MERKEZÊ XEBERAN