Hemserekê Şaredarîya Bajarê Girdî yê Amedî Gultan Kişanake û Firat Anli û Verfeka KJAye Ayla Akat Ataye ameybî tewqîfkerdiş. Vera tewqîfkerdişê înan de îzehetê çapemenîye ame viraştiş. Hemsereka Pêroyî ya DBPyî Sebahat Tuncele, Parlamentera HDPyî ya Amedî Çaglar Demîrele, Meclîsê Dayîkê Aştîye, endamê KJAyî û xeylê kesî beşdarê îzehetî bîyî.

Ser nameyê cinîyan Ceylan Bagriyanike damûstayîn da. 

Rayverîya Arîn Mîrkane de cinîyî qezenc kerdî

Bagriyanike îzehetê xo de 1ê Teşrîna peyên ya Roja Kobanê ya Dinya zî da vîrî û wina va: “Ez bi wesîleya sergêra 3. a Azadbîyayîşê Kobanê, şehîdê ke Kobanê de xover dayî, ez vîrardişê înan ver de milê xo çewt kena. Vera hêrişê hêzê sîstemê dagirkerî yê camêrdî û çeteyanê DAIŞî de Arîn Mîrkane û şaro ke rayberîya cinîyan de xover dayî, qezenc kerdî. Kobanê bi serkewtişêko gird, tarîxî tacîdar kerdo.”

Faşizm sînor nas nêkeno

Bagriyanike dewamê qiseykerdişê xo de bale ante ser polîtîkayanê dewlete û va: “Wehşetê ke Cizîr de ameyî cuyayîş, tayînkerdişê qayûman, karî ra dûrvistişê bi hezaran mamostayan, padîyayîşê dezgeyê çapemenîye û tewqîfkerdişê hemserekan û verfeka KJAye nişan dano ke faşîzm sînor nas nêkeno. Na vera îradeya cinîye de derbe ya. Nê semedî ra şero ke domîyeno, nê şerî de huqûq çin o.”

Ma seba xoverdayîşî veng danî heme cinîyan

Bagriyanike qiseykerdişê xo de veng da heme cinîyan û wina domna: “Hukmatê AKPyî wazeno azadîya cinîye û ya şarê kurdî xesp bikero. Wazenî bi padayîşê dezgeyanê ma, ma teslîm bigîrî. Bi no hawa wazenî vernîya tedavînayîşê cinîyan akerî. Ganî her keye, ziqaq û taxe bibî warê ke cinîyî azadîya xo tede gêrenî. Ma seba nêyî veng danî heme cinîyan wa piştîdayîşyewbînanê xo gird bikerî.” 

Bagriyanike peynîya qiseykerdişê xo de wina va: “Ma cinîyî hukmatê AKPyî ra çîk nêpawenî û senî ke ma Kobanê de xover da, reyna zî ma xover danî. Ma bi tewqîfkerdiş, merg û hêrişan nêqedîyenî. Ma heqîqetê azadîye yî, şima zî huqûqê koletîye yî. Ma her tim est bîye, estî û nika ra pey zî do bibî.”   


RCS:Kerdenanê derbe ra fek veradê!

Heto bîn ra vizêr 45 Rêxistinê Civaka Sivîl ke Parka Sumer yê Amed de are bî derheqê derbeya qeyûm û sereştişanê verra çapemenîya mûxalîf de kombîyayişê çapemenî viraştî. 

Dûştê kerdenanê faşîzan yê AKP jû reaksîyon zî RCFSyan ra amê. emsîlkaranê 45 RCS ke hêrişanê AKP zey derbe hesibnay, aşkere kerdî ke AKP çîyo ke sondiq de nêgirot dest wazena bi zorvajî bigîro. Rêxistinê Civaka Sivîl veng day AKP ke kerdenanê mudaxaleyê îradeyê şarî ra ca de fek veradê. 


 ANF / AMED