Ewro serrgêra 29. ya wefatê roşnvîrê kurd Nureddîn Zaza yo. Nuştox û sîyasetmedarê kurdan Nureddîn Zaza; sibata 1919î de Maden de maya xo ra beno û Nureddîn Zaza zî sey roşnvîranê bînî yê kurdan heta demêkî welat de maneno û dima ra zext û tedayan ver mecbûr beno û koçê welatanê bînan keno. O zî sey roşnvîranê bînan heme cuya xo dîyaspora de seba averşîyayîşê ziwan û kulturê kurdan feda keno û 1988 de Lozan de bi nêweşîya rîşa merdimwere ver wefat keno
Nureddîn Zaza roşnvîr, nuştox, sîyasetkar û kurdîko welatperwer o. Serewedaritişê Şêx Seîdî de keyeyê ey zilm û tada dîya. Mecbûr mendo ke birayê xo reyde şîyo Sûrîye. Ewta de xebata xo ya sîyasî dewam kerda. Hewar û Ronahî de hîkayeyî nuştî. Sûrîye, Lubnan, Urdun û Iraq de ameyo tepiştiş. Epey serrî zîndanan de mendo. Yew wext yeno Tirkîya û bi hawayo nimitkî Tirkîya de maneno. Bandî şono Almanya. Almanya, Swîsre û Fransa de xebata xo ya sîyasî û kulturî dewam keno. Semedo ke ziwanê kurdkî aver şêro, Parîs de Enstutiya Kurdî de beno mamosteyî kurdî. Kurdî, tirkî, franskî û erebî zanaynî. Edebîyat û kulturê kurdan rê zî yew xizmeto pîl kerdo.
Enstîtuya Kurdî de mamostatî keno
Eserê Nureddîn Zazayî nê yî: Bîranîn, Kurdên Nejibîrkirînê, Bîr Kurt Olarak Yaşamim, Gule. Epey eseranê erjayeyan vîyar de, no nasîhetê zî kurdan rê keno. “Gelê kurdan, eke şima nêwazenî ke tarûmar û vînî bibî, eke şima wazenê ke bi rûmet (şeref) û çareberz biciwîyî, verê heme çîyan, ganî şima bi ziwanê xo biwanê û bidî wendiş.” (Eke ma ziwanê xo reyra qisey nêkê, ziwanê serdestan qalî bikê zonê ma helêno. Ziwanê ma bihelîyo, ma zî qedînê, bi temam dekewenê binê hegemonyaya serdestan. Ma bi ziwanê xo qisey bikê, biwanê, binusê zaf rind beno. Ne ma yewerî ra cêr ê, ne zî ziwanê ma ziwanê yewerî ra cêr o.)
NAVENDA XEBERAN