Komîteyê KCK vist vîrî ke hometa îslam emserr zî roşanê remezanî bin zilm, şîdet û zextî de pêşwazî kena. Komîteyî aşkere kerd ke Rojhelata Mîyanî de DAIŞ û pîyakarê ci Erdogan her roj benê sebebê vinîbîyayişan. Damûstayîn de alim û seydayanê kurd ra, misilmananê tirk ra waşt ke dûştê Erdogano ke dînî îstîsmar keno de tewir bigrê û hemverê ci de vinderê. Komîteyê Şaran û Îtiqatan yê KCK waşt ke no roşan bibo wesîleyê çarekerdişê meseleyan, haştîya şaran û roşanê remezanî bimbarek kerd.
Quwetkerdenê jûbîyayene
Hemserokîna KONGRA GEL zî bi wesîleyê roşanî vengê quwetbîyayen da. KONGRA GEL zî hayr ant faşîzmê Erdoganî û êrişanê vera şarê kurd ser. Damûstayîn de vajîya ke zehmetî û zorvajî îşaretê quwetkerdenê jûbîyayen kenê. KONGRA GEL roşanê Bakûr, Başûr, Rojawa, Rojhelat û kurdanê teberê welatî bimbarek kerd û waşt ke roşan bibo wesîleyê jûbîyayena netewî.
Roşanê azadî û demokrasî
Koordînasyonê Kantonê Rojawanî (Cizîr, Kobanê û Efrîn) bi vesîleya ameyîşê Roşanê Remezanî aşkeraya nuşteyîn weşîna û roşanê şaran bimbarek kerd û va: “Demêko welatê ma de binê hêrişê çeteyan de yo, Roşanê Remezanî bi ser ma de yeno. Wa ma bieşkerî zerrîya domanê xo ya ke êdî tersê çeteyan, vengê teqyayîş û bombeyan betilyayî, kêfweş bikerî.”
Aşkeraya koordînasyonî wina dewam kerd: “Ma şarê xo yê Rojawanî ra wazenî ke zerrîya domanê xo bi serkewtişî ke hêzê ma yê qehraman çeperan de bi dest vistî, kêfweş bikerî. Seba ke kêfweşî heqê înan ê xozayîn o. Şarê ma bieşkero mîyanê pergalê Federalîya Demokratîke de heqê xo yê cuya bi rûmet û bi dest bivisno. Roşano tewr gird, roşanê azadî, demokratî û aştî yo. Ma pêroyîya Ummeta Îslamî bi omidî ke verba heme hetî ke hewl danî seba menfaetê û xeyalê xo yê awankerdişê împaratorîyan, raştîya îslamî sîya kenî, bivindernî.”
BEHDÎNAN/QAMIŞLO