Li ser navê komê Seroke ABF'ê Selahattîn Ozer, axivî û diyar kir ku di 24'ê Kanûna 1978’an de dewletê bi saziyên faşîst ên sivîl re hevkarî kir û li Gurgumê komkujî pêk anîn. Ozer, da zanîn ku di ser komkujiyê re 34 sal derbas bûn û hê jî êş û birîna wan taze û germ e. Ozer, da zanîn ku hê jî birînên wan germ in û wiha pêde çû: “Wekî malzaroka dayikên me ji nûve bên kêrkirin, pêsîrên wan bên jêkirin û pîr û kalikên me bên perçekirin. Wekî ku bi guleyan qul qulî bikin.”
Ozer, helwesta Waliyê Gurgumê ya destûrnedayîna çalakiya wan jî şermezar kir û wiha axivî: “Weki sala par îsal jî destûr nedan ku em li Gurgumê daxuyaniyê bidin çapemeniyê. Waliyê Gurgumê serlêdana Komeleya Elewî û Bektaşiyan a ji bo bîranînê red kir. Waliyê Gurgumê jî wekî Serokwezîrê Tirkiyeyê Recep Tayyip Erdogan ji elewiyan nefretê dike. Sala par jî li Sêwas û Gurgumê bi ser çalakgeran de gaza îsotê rijandin. Hikûmet destûr nade ku em miriyên xwe jî bibîr binin.”
Ozer, helwesta hikûmetê ya li hemberî komkujiyan şermezar kir û xwest hesap ji kujer û kesên fermana komkujiyan dide bipirse û wiha dawî li axaftina xwe anî: “Tenê komkujî bi 163 xetên nivîsê hatiye bibîranîn. Çend sal derbas dibin bila bibin, dê birînên komkujiya Gurgume her tim zindî be û dê her tim tekoşîna me bidome.”
DÎHA/ENQERE