Partîya Demokratîke ya Şaran seba aşkerekerdişê vilawekê weçînayîşê 24ê Hezîrane kombîyayîşêk viraşte. Kombîyayîş de vilawekêka hîra ya Selahattîn Demîrtaşî ameye aşkerekerdiş. Kombîyayîş de Hemsereka HDPyî Pervîn Buldane qisey kerde û wina va: “Ma seba ke huzir, şayî, heq, seyyewbînanî û azadîye bîyarî, yenî. Ma seba tarîtîye roşin bikerî, yenî.”

Partîya Demokratîke ya Şaran (HDP) seba weçînayîşê Serekkomarî û parlamenterîye yê 24ê Hezîrane kombîyayîşêk viraşte û vilawekê xo yê weçînayîşî aşkere kerdî.

Kombîyayîş de siloganê esasî yê HDPyî ‘Bi to bedilîyena’, ‘Bi cinîyan bedilîyena’, ‘Bi ciwanan bedilîyena’, ‘Merdimêko baş Demîrtaş’, ‘Ma tîya de eşkenî’ û ‘Yew ray Demîrtaş rê yew ray HDP rê’ pankartan ser o ameyî nuştiş û pankartî aliqîyayî.   

Hemserekê Pêroyî yê HDPyî Pervîn Buldane, Sezaî Temellî û temsîlkarê xeylê partî û rêxistinan beşdarê kombîyayîşî bîyî û kombîyayîş bi coşêko gird ame viraştiş. Kombîyayîş de yew bi yew nameyê parlamenter û sîyasetmedarê tewqîfbîyayeyî ameyî wendiş û çepikî kuyayî.

Vilaweka Demîrtaşî ameye wendiş

Dima ra vilaweka weçînayîşî ya Namzedê Serokkomarîye Selahattîn Demîrtaşî ameye wendiş. Vilaweka Demîrtaşî de ameyo vatiş ke ‘ez seba ke rejîmê yew merdimî biqedêna, yena’ û vîlaweke de ca dîyayo xeylê babetan ser. Vilaweke de qala qanûno bingeyî yo demokratîke ameyo kerdiş û bale ancîyayo wedarnayîşê OHALî ser. Reyna polîtîkayê ekonomîke ra heta polîtîkayê pozîtîfî yê cinîyan zî vilaweke de cayê xo girewtbî. Heto bîn ra vilaweke de bitaybetî ca dîyayo îbadetxaneyê elewîyan û ameyo vatiş ke cayê ke elewîyî tede îbadet kenî, ganî heme sey îbadetxaneyî bêrî şinasnayîş. Zext û îşkenceyê zîndanan zî vilaweke de estbî û ameyo vatiş ke nê zext û îşkenceyî bêrî wedarnayîş. Reyna vilaweke de ca dîyayo problemanê ciwan, cinî, perwerde, sosyal, kulturî û sewbîna zî.

 

Ma do bi tesilê qezenç bikerî

   

Dima ra Hemsereka Pêroyî ya HDPyî Pervîn Buldane qisey kerde. Buldane va ‘ma bihêvî, biheyecan û qerardar î’ û wina domnaye: “Seba ke ma bibedilnî, ma yenî. Ma seba cuyêka azade û seyyewbînane yenî. Ma seba edaletî yenî. Ma seba ke rojanê huzurinan bidî destpêkerdiş, yenî. Ma Ege, Behro Sîya, Marmara, Behro Sipî, Serhat, Botan û Amed î. Ma Anatolîa û Mezopotamya yî. Ma dewijê ke hêgayan de ameyî vîrîkerdiş î. Ma karkerê ke fabrîkayan de kede danî yî. Ma dayîka ke cuye îdare kena yî û ciwanê hêvîya ameyeyî yî. Ma hêzê demokrasî ke bi serran o rasteyan de têkoşîn danî yî. Ma cinî, karker û kedkar î. Ma Dayîkê Aştîye û Dayîkê Şeme yî.”

Ma heme pîya yî

Buldane dewamê qiseykerdişê xo de wina va: “Ma seba ke huzir, şayî, heq, seyyewbînanî û azadîye bîyarî, yenî. Ma seba tarîtîye roşin bikerî, yenî. Ma zaf bêrîya huyayîşî kerdo, ma seba huyayîşî yenî. Ma seba ke Demîrtaşî bikerî serekkomar, yenî. Birêz Demîrtaş êdî namzed nîyo, Serekkomarê bi mîlyonan o. O serekkomarê kurd û yê hêzê demokrasî yo. Bivinderê, ma yenî. Bivinderê Demîrtaş û HDP yenî. Seke Seyyîd Rizayî vatêne ‘wa no înan rê bibo derd’. Nika wextê serkewtişî yo. Ganî ma bi fikirîyayîşê ameyeyê xo şêrî sindoqan ser. Rayê ma rûmetê ma yo, ganî ma wayîrê rûmetê xo bivejîyî. Ma 7ê Hezîrane de serkewtî, ma do 24ê Hezîrane de zî serbikewî. Şima tena nîyî, ma heme pîya yî.”

ANQERE