Biwanê û bidê wendiş

Azadiya Welat Roja Rojnamegerîya Kurdî de bi nameyê ‘Her banêk, welatêk’ destpa kampanyayekê kerd. Çarçoveyê kampanya de zî nika bi seyan zerrîdarî kûçe bi kûçe, tax bi tax seba zafkerdişê tîrajê Azadiya Welatî xebityenî.Qadro û mamosteyê ke warê ziwanî de xebityenî hetkarîya xo seba kampanya nîşan dayî û vatî ke Azadiya Welat seba ziwanê kurdî, zey wendegehêk o. 

Ziwan rojname yo 

Hemserokê Kurdî-Derî Ozan Kilinç kampanyaya Azadiya Welatî ser o vat ke ez zî xebatkarî rojnameya Azadiya Welatî bîya, destpêkerdişê na kampanya goreyê min weş bî, serkewtiş û firaz o û wina vat: “Ma veng danî heme wendekarê xo wa bibî aboneya rojname. Wa heme banan ra rojnameya Azadiya Welatî bikewa û her kes biwana. Seba çi seba ziwan û averşîyayîşê ziwanî? wa her kes wayîr bivejo Azadiya Welatî ra. Her banêkî ra welatêk bikewo, xo ra dirûşmê kampanya zî ‘Her malêk, welatêk’ o. Ma zî hetkarî danî na kampanya û ez zî bîya aboneya rojname. Ganî her kes bibo aboneya rojname û wayîr rojnameya xo bivejî û wayîr ziwanê xo bivejî. Çimkî ziwanê ma rojnameya ma yo, ziwanê ma zî rûmetê ma yo.”

Zey wendegehêk o

Rayverê Kurdî-Derî Hidir Karataş zî ciresna ke Azadiya Welat zey wendegehêkî şarî yo, destpê xebatkerdişî ci ra nika xebatêke zaf erjîya kerdo, ê ziwanê xo bi Azadiya Welatî aver berdî û no dergî da qiseyê xo: “Ganî na raverêye de rojnamegerî ra hetkarîyêke gird bêra dayîş, çi heyf ke demo ke merdim dorûverê xo ewnîyeno, rojnameyê bîn yenî rotiş, goreyê demo vîyarte rotişê Azadiya Welatî hem tayn o hem zî eleqayê wendoxan zaf serd bîyo. Ya kesê ke abone bîyî aboneyîya xo betal kerdî ya zî rojname tena gênî û nêwanenî. Ez xora aboneya rojname ya. Goreyê min heme xebatkarê Azadiya Welatî bi koordîne bixebitî ke averşîyayîşêk bibo. Çi heyf ke vilakerdoxê sifte Ozgur Gundemî roşenî, no zî şaş o. Ganî vilakerdoxî, seba wendişê Azadiya Welatî xebatêk bikerî. Yanî ma raştî bivajî kêmanî esta la çi zî bibo do ma seba averşîyayîşê xebat bikerî û hewl bidî ke dorûverê xo bikerî abone.”

Biwanî û bidî wendiş

Mamosteya zaraweyê kurmancî Berîvan Matyar bal ant warê perwerdeyî de muhîmîya Azadiya Welatî ser o û wina domna: “Ez bi xo seba averşîyayîşê ziwanî, demê wendekarê xo de her tim Azadiya Welat wenda, çimkî Azadiya Welat zey wendegehêk xebat keno. Wendekarê xo ra veng dana ke seba averşîyayîşê kamî, ziwan û kultirê xo Azadiya Welatî ra wayîr bivejî, biwanî û bidî wendişî. Bi no rayîrî eşkenî wayîrê ziwan û kultirê xo bivejî.”

No rojname ewnîyayîşê ma yo

Mamosteyê zaraweyê kirmanckî û rayberê Kurdî-Der’î Haci Ozkal zî dîyar kerd ke o vernî de hem Azadîya Welatî rê hem zî xebatkarê ey rê serkewtiş wazeno û wina domna: “Heqîqetan ma zaf deyndar î na rojname rê la ma zaf zî heqê ey nêdayo la çikê ke ma bikerî, vernî ma de zaf o. Ma her tim xebat, xebatkarê Azadiya Welatî ra pawito, xebatkarê Azadiya Welatî zî ma bivejî 13 kesî yî û no ser zî nêeşkenî karê 30 mîlyon kurdî xîtap bikerî. Ma ganî zey yew xebatkarê Azadiya Welatî no karî bigêro serê xo, ma zî bieşkerî ke ewta de hetkarîya na rojname bikerî. Na rojname ewnîyayîşê ma ya, vînayîşê ma ya. Çikê ke ma mîyan de û dinya de qewimyeno, hem ma ra resnena hem zî dinya ra resnena. No semedî ra zî senî şîra aver û dûr biresa, bi ma û merdiman bivirazo. No semed ra zî barêke ser ma de ya, ma nêardî cayê xo, yanî tena abonebîyayîşî zî qiym nêkeno. Gerek ti zereyê ci ra biewno û zereyê ci de çi yeno vatiş, wazeno ke merdim fam bikero, ti zî merdiman reyde bar bikerî. Ti zî bibî zey rayberêk û wezîfe bigêro ser xo la ma nêkerdî.”