Wextê piyabiyayiş o
Nûmayişkaranê grevê veyşanî yê Îzmîr, aşkere kerdî ke, ebi grevê veyşanî wazenê veng bidê vengê Kurdan. Nûmayişkaran ra, azaya Meclîsê Partî yê HDP Zarîfe Karasûngûr ard zon ke, ê wazene damûsne ke, ebi xoverdayişê Kurdan ra piya yê. Karasûngûr aşkere kerd ke, hêrişî tenya verra Kurdan nê, verra pêrokîn şaranê Anatolya yê û niya va: “Neyî ra tepya kî, nûmayişê alewiyan dê dewam bikerê. Nûmayişkaran ra Mûstafa Aslan’î kî vist vîrî ke, verra na zilim bêveng mendiş raşt niyo. Aslan’î va, nika wext her ca de piyabiyayiş o.
Bloqê verra faşîzm
Heta bîn ra, temsîlkarê alewî vizêr nê perey, meclîs de bi hemserokê HDP Selahattîn Demîrtaş‘î ra pêdiyay. Sazgehê Alewî, bi rojano bi grevanê veyşanî û nûmayişanê ciya hayr ancenê terorê dewleta Tirk ser û protesto kenê. Alewî eynî wext de wayirê xoverdayişê Bakur vejiyenê û seweta ronayinê bloqê verra faşîzmî zî gureyînan ramenê.
Serokê Federasyonê Alewî Bektaşî Bakî Duzgun, Serokê Komeleyê Kiltur Pîr Sultan Abdal’î Ganî Kaplan, Serokê Komeleyê Kiltur yê Alewiyan Dogan Demîr û Serokê Weqfê Anadolu yê Kilturê Heci Bektaşî Welî ra piya xeylê pîr û rayverê alewiyan şî ziyaretê Hemserokê HDP Selahattîn Demîrtaş’î.
Serokê Federasyonê Alewiyê Bektaşî’yan Bakî Duzgun’î ziyaretî de qisey kerd û vist vîrî ke, 2 heftey ra jêde wexto, alewî, bi grevê veyşanî û nûmayişan eleqe ancenê hêrişanê verra Kurdan ser. Duzgun’î da zonayene ke, înan bi Serokê CHP Kemal Kiliçdaroglu û Serokwezîr Ahmet Davutoglu ra pêdiyayin viraşto û wastenê çareserîyê demokratîk û muzakereyan ardo ziwan.
Bindestan het de ca bigîrê
Demîrtaş’î derheqê ziyaretê temsîlkaranê saziyanê alewî de, kêfweşînê xo ard ziwan û aşkere kerd ke, nûmayişê alewiyan verra faşîzmê AKP, îşaretê do zaf rindo. Demîrtaşî va: “Ma nêvanê Kurdan het de ca bigîrê, vanime bindestan het de ca bigîrê. Şima lazimînê însaney anê ca û seweta heme şaranê Tirkiye benê nimûne.
Awrûpa de nûmayişê alewiyan
Verra zilm û zorvajiyê AKP nûmayişê Alewiyan, welatanê Awrûpa de kî destpa kerd.
Vizêr sûka Almanya Stûttgart de, temsîlkaranê sazgehanê demokratîk yê alewiyan, ver konsolosxaneyê Tirkiye de nûmayişê protestoyî viraşt. Nûmayiş de, hayr anciya ablûqa û terorê dewlet yê verra sûkanê Kurdistan û qetilkerdişê sivîlan ser.
Hannover de zî, ser vengdayişê AABF şêlig are bî û ver konsolosxaneyê Tirkiye de, kerdenê dewlet amey protestokerdin. Şêlig çelenga siya rona ver konsolosxane. Nûmayişa ke vengdayişê ‘verra faşîzm cepheyê wertex’ amê dayen de, sloganê zey ‘Kurdistan faşîzm rê beno mezel, kiştox dewlet’, ‘kiştox Erdogan’ berz bî.
Sûka Almanya Karlsrûhe de zî terora dewlet ver konsolosxaneyê Tirkiye de protesto bî. Temsîlkaray Partiya Çep yê Almanya Dîe Linke zî, destegê xo yê serva tekoşînê şarê Kurd aşkere kerd. Herzewbîn xeylê sûkanê bîn yê Awrûpa de nûmayişî viraziyay.
Paytexta Belçîka Bruksel de zî, ver bana Parlamentoyê Awrûpa de, Kurdistanijan grevê veyşanî yê hîrê rojan da destpakerdin.
NAVENDÊ XEBERAN