Dewleta Tirk 14ê Hezîran de herêma Zege ya Newala Pilêmurîye yê Dersim de bi helîkopteranê Kobra welatijê ke şîbî seyrane bombarduman kerd. Netîceyê bombardumanî de welatijê bi nameyê Pinar Aydin û Ozdal Donmez giran bibî dirbetin. Derheqê dirbetinan de tehqîqat ame dest pêkerden. Îdiayanê “2 kesê kurye amey tepiştiş” yê walîyê sûk ra cewab malbata Donmezî ra ame. Malbatî îdîayanê walî rê nêrazîbîyayîş damûsna û da zonayen ke, lajê înan amadekarîyê zewicîyayîşî keno.
Wextê bombardumanî de jew şoforê tankereke û 2 welatijî ameybî padayîş. Ozdal Donmez ke bombardumanî de giran bi dirbetin wedarîya nêweşxaneyê Erzêrûm, Pinar Aydin zî wedarîya nêweşxaneyê Xarpêt. Dermankerdişê Donmezî nika nêweşxaneyê Dersim de rameno. Destê ci bi ranzayê ameybî kelepçekerdiş, ser îtirazê ÎHD ya Dersimî, kelepçe amey akerden.
Qerarê tepiştişî ame dayen
Walîyê sûk ke wazeno sûcê xo binimno, sivîl ke giran bî dirbetin zey kurye damûsnayîş. Badê nê îdîayanê walî Serdozgerîya Komare ya sûk derheqê Donmez û Aydin de tehqîqat akerd. Tehqîqat hona rameno, la derheqê dosya de qerarê nimite ame dayen. Herzewbîn derheqê Aydin û Donmez de qerarê tepiştişî ame dayen.Pawitoxê Aydin û Donmezî aşkere kerdî ke ê resimanê ke hetê teyaregeha keşfî amey antiş pîtenê.
‘Do kesek nêşiro cayeke’?
Dayika Donmezî Nurhan Donmez da zonayen ke, polîsê ke ver kêberê nêweşxane de vindenê destûr nêdanê ke ê mordemanê xo bivînê. Nurhan Donmez zî vist vîrî ke domanê înan seba geyrayîşî û seyranî şîyê herêm û vera îdiayanê pûç û zûrîyanê walî hêrsê xo bi nê vatenan ard ziwan: “Do hinî kesek besenêkero şiro cayeke? Domanê ma kurye nîye.”
Apê Donmezî Mîralî Donmezî zî dîyar kerd ke haya înan estbî ke domanê înan dê şirê seyrane û va: “Sifte vatî “pirodayîş” vejyayo û dirbetin biyê. Dima ra vatî “kurye” yê.”
Donmezî aşkere kerd ke birazayê ci Donmez bi Pinar Aydin ra amadekarîyê zewicîyayîşî keno û va, îdiayê ke derheqê hurdîyan de yenê vaten raşt nîye.
DÎHABER/DERSIM