Gorê nînan AKaPe wastenê mesela halbikero.
‘Na weçînîtîs de nê, weçînîtîso bîn de endî halkeno’ vatenê nî ‘demokratan’.
Nînan 2002, 2007 û 2011 de poştî dê Erdoğanî. AKaPe tene kî bi yardimê nî ‘demokratan’ amê na roze. Ewro bomba kerdena welatê ma de tabî yardimê nînan esto. Çike hona kî poşt danê na partîya faşîste.
Erdoğanî demê weçînîtîs de nijadperestenî kerdenê, ‘demokratan’ vatenê weçînîtîs o, coka nîya keno, weçînîtîs ra tepîya na polîtîka caverdano.
Nika Erdoğan Çiller ra zaferî bîyo Çiller, Yilmazî ra zaferî bîyo Yilmaz.
Ebi taybetîye zaferîya rojnamevan, roştberî û wendoxanê Tirkîya zaf sare huskî yê.
Di rengê xo estê, yemê teverî sur o, melayîm o, rakerde oseno o, yemê zerî tam şaûsote wo nijadperest o. Nî pêro waxtê tenge de lewê hukumat û dewleta xo de ca cenê. Seweta Kurdan kî gegane helbest û nustîsanê arabeskan nusnenê.
Nêzon mi nêmorde hata nika çond dolimî eskerê tirkî Qendîl bomba kerd, hama zonen ke qeyta jû raye sernêkewt. Dewizê ma kiştî, însanê ma kiştî, darûberê ma vêsnayî, labelê mesela hen hurendya xo de mende.
Serek mûnafiq Erdoğan nika pasna Tansu xanime û yê Mesut Yilmazî lêseno. Fitara xo bi kistene keno ra, gonî simeno.
Sodir vano ‘nika ma xatirê Ramazanî ra vengê xo nêvezeme’ son de Ramazanî wertê gonî û gonaşîrî de verdano. Tirkîya poştya xo Nato ra gireda, kuna gonya ma Kurdan.
Qeyta jû hukumatê tirkî honde xizmeta Nato nêkerda. Hukumatê AKaPe tam bîyo carîyê Nato.
Qeyta jû sîyasetvanê tirkî honde RTE zurî nêkerdenê. Vatîsê ke RTE nika vano, eyra avê Çillerî vatenê, Mesut Yilmazî vatenê, Ecevît vatenê.
Jû ferqê xo esto: Înan mesela Kurdan qeyta qebul nêkerdenê, RTE qebul keno hama metodanê înan ano kar.
Ebi na hal o kî peynîya xo keno amade. Roze yena o kî keno vîndî, jê Tansu Çiller, jê Mesut Yilmazî. Binê na mesela de pêro sîyasetvanê tirkî mendê, RTE kî hen beno.
Ma de jû qese esto vanê ‘kam ke kineno keno xoro’. Erdoğan ebi na herb xanê Tirkîya yê tertelu hebena keno dewlemend.
Jû kî mordem gune çapemenîya tirkî xo vîramekero. Leto jede faşîst û nijadperest a. Se ke nî rozanê peyenan de taye eskerê kanî şî, gune taye rojnamevanê kanî kî şerê. Belka bi na tore hometa Tirkîya hebena bena roştî û na çapemenîya faşiste ra xeleşîna, raya xo vînena.