Kîsik û hîrabîyîşê nêy damarî bi awayo bêveng aver şono, wexto ke vejyeno teber xo reyde talukeyê xeylê gird zî ano. Kam wext û kam ca de vejyeno meydan dîyar nîyo û ger ke bêro şopnayîş do hîna rew bêro vînayîş. Wexto ke ame vînayîş zî lazim o bêro amelîyatkerdiş. Babete sero Nêweşxaneya Memorîal a Dîcleye ra beşa Damar û Qelbî ra Prof. Dr. Bînalî Mavîtaş zanayîş da.
Muhîmîya cuyeyî
Mavîtaş dergeyîya qalîkerdişê xo de ciresna ke no damar wexto ke qelbî ra vejyeno, gonî laşî sero vila keno û wina verdewam kerd: “Hîrayîya no damarî nêzdîyê 2,5 cm o. Laşê merdimî de hende hîra yewna damar çin o. Ser nêy damarî de kîsik û hîrabîyîşî ra ray bêveng û bêşop benî vêşî. Nêyî zî bi awayo dirabîyîş û şeqîyayîş xo nîşan danî û nînan ra anevrîzma yeno vatiş. Şeqîyayîş û dirabîyîşê damarî zî benî sebeb ke gonî mîyanê laşî de vila bibo û no rewş zî cuyeyî tehdît keno.”
Bi dej xo nîşan dano
Mavîtaş qalîkerdişê xo de bal ant ser xodayîşê teber a anevrîzmaye û wina verdewam kerd: “Rewşa pêroyî de anevrîzma xo krîza qelbî de dano teber. Teşhîsê ci wexto ke aver şi de dîyar beno, labelê ra ray analîzê ke semedê yewna çî yeno kerdiş de zî yeno vînayîş. Tay nêweşê zeîf semedê ke pîzê înan de dej esto, şonî nêweşxaneye û muayene benî de vejyeno teber..”
Goreyê rewş beno
Mavîtaş ard ziwan ke goreyê tewira anevrîzmaye û cayo ke vejyeno zî bedilyeno û wina domna: “Ger ke anevrîzmayekî masayo se tepaaçarnayîşê ci ya halo kan, mumkin nîyo. Tay dermanan reyde rîskê dirabîyîşî eşkeno bêro kêmkerdiş. Ger ke damarek 5 cm hîra bîyo se bi kontrolê şeş aşman de eşkeno bêro pêmawitiş. Ger ke mîyanê nêy demî de hîna rew hîra bibo se aye wext lazim o bêro amelîyatkerdiş. Çîyê ke semedê qelbî talukeya krîzî virazenî, heman awayî semedê nêweşanîya anevrîzmaye zî vîyarte yî. Taybetî antişê cixare, tansîyonê berz û obezîteye rîskê anevrîzmaye vêşî keno.”
Xo ra haydar bê
Mavîtaş qalîkerdişê xo de ard ziwan ke anevrîzmaya Aortî hîna zaf 50 serre ra pêy yena dîyîş û qalîkerdişê xo wina peynî kerd: “Nêweşê ke nêweşanîya tansîyonê berz înan reyde esto, êy ke damarê înan wişk bîyî semedê nêweşê ke emrê înan pîl o, binê rîskekî girdî de yî. Nêweşê ke sendromê Marfanî û wişkbîyîşê damarî înan reyde esto lazim o ra ray kontrolî ra bêrî vîyarnayîş.”
NAVENDA XEBERAN