Başûrê Kurdîstanî de boykotkerdişê malê Tirkan dewam keno. Qezaya Soranî ya Hewlêrî de zî kampanyaya boykotî domîyena. Şarê Başûrî herinda malê Tirkan de malê cayî hêrîneno. Babete ser o mamostayan ajansê Rojnews ra Zahîr Îbrahîmî rê qisey kerd.
Mamosta Asos Salihî dîyar kerd ke seba vindarnayîşê dagîrkerîya dewleta Tirkî boykot çareyêk o û wina va: “No çare vera dagîrkeran de mesajêk o. Boykotkerdiş ruhê Kurdîtîye ganî kerdo û na îrade vera dagîrkeran de bîyo wayîrê hewldayîşî. No boykot wina kerdo ke şar herinda malê Tirkan de malê xo biherîno û cayanê karî yê xo akero.”
Mamosta Dilşad Biradostîyî seba boykotî veng da herkesî û wina va: “Tîya de kesê ke çîyanê Tirkan herînenî, wa bizanî ke no pere reyde gule, bombe û sewbîna çî yenî herînayene û ginenî şerwan, cinî û domananê Kurdan ro. Coka ê kesî eşkenî bi boykotkerdişî şarê xo qirkerdiş ra bixelisnî.”
Ganî herkes destek bido
Mamosta Xalid Xidirî zî hêvî kerd ke kampanya hîna zaf vila bibo û wina va: “Boykot raşteraşt derbe dano hetê leşkerî yê artêşa Tirkî ro. Coka ez hêvî kena ke no boykot hîna zaf hîra bibo. Seba ke wa artêşa Tirkî ma ra pere qezenç nêkero, ganî boykot hîra bibo. No wezîfeyêko neteweyî yo. Ganî herkes destek bido.”
SORAN