AKP ya ke bi aşmano sûkanê Kurdistan de, vera şarê Kurd lej ramena, butçeyê 2016î ra 76 mîlyar 654 mîlyon û 303 hezar TL serva herb abirna. Dûstê nay, xeylê çormeyan ra nêrazîbiyenî yenê.
Fatûre kedkaran ra birniyena
Qiseykerdoxê Platformê Şûbeyê KESK yê Îzmîr Bahrî Akkan vist vîrî ke, butçeyê 2016î goreyê herb û serva menfeatanê dînî ameyo eyar kerdin û ard ziwan ke, dîyanet hendê perwerde butçe ra bare giroto û kedkarî nêşkenê nay qebûl bikerê.
Serokê Şûbeyê Homara 2 yê Egîtîm-Sen Hasan Alî Kiliç’î zî da zonayene ke, 13 serrî yo îxtidara AKP, hetê sermayedaran de ca gêna. Kiliç’î aşkere kerd ke butçeyê 2016î ra zî ayseno ke serva perwerde û weşî rê bareya qijkek (werdî) abirniyayo û wina va: “Bara ke herbî ra abirniya, jew riyê ci yo ke ayseno esto, jew zî yo ke nêayseno esto. Herb her ke şino beno gird. No herb, ne goreyê menfeatê şaranê Tirkiye yo, ne zî goreyê menfeatanê kedkaran o. Kiliç’î dîyar kerd ke, şarê Tirkiye zî, kedkarî zî hetkarê herb niyê. Gune ma gurekarî hetkarê haşitî bikerê. Fatûreya herbî kedkaran rê birniyena.
Bêvengî herb ana
Vera butçeyê herb jû nêrazîbiyen zî sazgehanê civaka sivîl yê Sêrt ra ame. Serokê Odeyê Esnaf û Senatkaran yê Sêrt Rifat Ayyildiz aşkere kerd ke, ebi herbî rê abirnayişê pereyan ra na mesele hal nêbena û îqazê ameyinê Tirkiye taloke de yo kerd. Ayyildiz’î aşkere kerd ke, gerek butçe goreyê xîzmet û menfeatanê şarî amebiyaybi eyarkerdiş û wina dewam kerd: “Faydeyê herbî kesî rê çinyo. Gune meseleya Kurdî de, ageyriyê muzakereyan. Herbê 40 serrî welatijan û esnafî mexdûr kerd. Gerek endî dewlet na raybazî ra fek virado. Meseleya Kurd bi şîdet nîna çarekerdin.
Serva ‘serokîn’ herkes bedel dano
Qiseykerdoxê KESK yê Sêrt Serdar Batûr zî butçeyê herb zey ’tersder’ bi name kerd û vist vîrî ke, no butçe dayenanê (bac) welatijan ra are beno. Batûr’î hendayî butçeyê herbî ra zî ‘bêvengiya rojawa’ mesûl girot û aşkere kerd ke, tenya Kurdî nê, ameyina şaranê Tirkiye zî bin talokeyê herb de ya. Serdar Batûr’î vist vîrî ke, rîwalê hezkerdişa sîstemê serokîn yê Tayîp Erdogan’î herkes bedel dano.
Menfeatê tacîranê herbî
Serokê Şûbeyê Odeyê Tabîbanê Tirk yê Sêrt Ekrem Bîlen’î zî polîtîkayanê herbî rê nêrazîbiyen damusna û vist vîrî ke, xerckerdişê cîhazanê teknolojîk yê ke herb de yenê şixûlnayen zaf girdî yê. Bîlen’î aşkere kerd ke, kesê ke wextê herb de tifingan roşenê, badê herbî zî îxaleyê cayê ke rijnay gênê. Ma diramê da winayîn cuwyenê.
Bîlen’î vist vîrî ke, nê pereyê ke tifing, barût, çekanê kîmyewî ra şinê, çehar leteyê welatî tesîr kenê. Bîlen’î hayr ant tecrîdê vera Rayverê Şarê Kurd Abdullah Ocalan’î ser û aşkere kerd ke, siyasetmedarê ke meseleya Kurd bi raya siyaset nêşkenê çare bikerê, raya Ocalan’î gênê û niya va: “Osmaniyan ra heta ewro, meseleya Kurd bi şîdet nêamê çarekerdin. Haşitî hendayî mûqades o ke, manîkerdişan nêsilasneno. Şîdet ma beno felaket. Cayo ke tifing estê de, her tim merdiş û dirbetinbiyiş esto.
Îxlalê heqê însanan o
Serokê Şûbeyê Komeleyê Heqê Merdiman yê Sêrt Zana Aksû zî butçeyê AKP rê nêrazîbiyen damusna û vist vîrî ke AKP civakî bi vatişanê ‘îstixrar’ û ‘weşî’ xapîna û badê weçînayinanê 1ê Mijdar’î zî îstixrarê şaran kerd xirab. Aksû ard ziwan ke, AKP cayo ke butçe serva rindî û weşiya şaran abirno, herbî rê abirnena. Aksû butçeyê herbî zey îxlalê heqê însanan bi name kerd.
DÎHA/ÎZMÎR/SÊRT