Tayê siyasetvanê tirkî onca çizenê, onca qîrrenê. Vanê ‘heyetê BDP û KCD ça şiyê Amerîka.
Ma ça nêşerê ke.
Niyê ke çizenê û qirrenê her roz sonê Amerîka.
Onca van, qarnaşî qotik verê velîk de.
Biçizê, biteqê!
Ebi xo sonê her guçikê dina ra fetelînê, verva kurdan herkesî ra poştî wazenê, kurdî ke şî cayê, nîsenê ro bervenê.
Vanê heyetê BDP û KCD şiyê Amerîka de ‘gerrê ma kenê.’ Ma pekî nî sima niyê ke pêro dugelan de gerrê kurdan kenê.
No hal jû ters ano ra zon. Kulê siyasetvananê tirkî esto. No kul ters dano nînan, nêverdano hewn çimanê nînan kuyo. Melemê na kulî çîno.
Hata ke mesela kurdî halnêbiyê, no ters û bêhewniya siyasetvananê tirkî manena. Keyke mesela halbiye, o waxt kul kî beno wes.
Wastena xo na wa ke, kurdan, Anqara û Kurdîstan de hepis kerê. O waxt şîkînê bijerê binê qontrolî.
Ma zoneme, çond serrî ra avê nînan Yunanîstan xorê jê dismenî diyenê.
Dima, ma dîke ebi Yunanîstan ra bî jû verva kurdan da pêro. Ala reye serra 1999 biyarîme xo vîrî.
Amerîka sarê nînan kerd çuwal. Erdoğan şî lewê Bush û hurdemîne vat letedê kurdan dismenê ma wo.
Tabi zorê xo Amerîka nêsono, sarê xo çuwal ra nêvezeno. Hama ebi hemkarê xora piya verva qomê mazlumî danê pêro.
Gorê mi, siyasetvanê kurdî gune Anqara ra vejiye, şerê her guçikê dîna û gerrê dewleta neqe bikerê.
Gerre çiyode xiravin niyo.
Kamî ke derdê xo nêvat, cirê derman kî pêda nêbeno. Derdê ma estê. Sevevê nî derdan kî dewleta tirkî ya.
Ma gerrê na dewlete nêkerîme, gerrê kamî bikerîme.
Jû dewleta ke 34 gencanê kurdî qirkena û mavên ra 4 asmî vêrenê ra, fermandar û qetilkaranê nî domonanê ma eskera nêkena, gerre ra qederî çiyo bîn heqnêkena.
Ma, kurdî hetê dîplomasî ra hem peyser mendîme, hem kî na raye kar ardene de zaf kewtîme herey.
Gerre kî na raye de jû metod o.
Dîplomasiya tirkî seweta tertelê ma her keşî de qesey kena, gureyena.
Ma kî seweta vurnayena sîstema siyasî yê Tirkiya, gune her kesî de bigureyîme û gerrê Tirkiya bikerîme.
Ma kesî ra seweta kistene çeku nêwazeme ke.