Nurîye Gulmene û Semîh Ozakça ke bi Qerarnameyê Hukmê Qanûnî (KHK) karê xo ra ameybî îxraçkerdiş, dest bi grevê vêşanî kerdbîy û grevê înan kewt roja 72.  Roja 71. ya çalakî de polîsan Caddeyê Yukselî de mudaxaleyê çalakîya grevî kerd. Netîceyê mudaxaleyî de 18 kesî ameyî tepiştiş.    Gulmen û Ozakça hêrişî ra dima îzahatêkî day û aşkere kerdî ke, eke hêrîşî dewam bikerê, ê dê 24 seat nobed bigîrê. Heto bîn ra medyaya komelkî ser o tayê kesî seba ke çalakgerî çalakîya xo biqedênî îmze arê danî. Kedkarê ke karê xo ra ameyî îxraçkerdiş, reaksîyon nîşanê nê kesan dayî. Babete ser o kedkarê cinîyî qisey kerdî. 

KESK wayîr nêvejîya

Kedkare Nursel Tanriverdîya ke Lîseya Teknîk û Meslekî ya Kagithane ra ameybî îxraçkerdiş, va ‘Gulmene û Ozakça bi desan reyan ameyî tepiştiş û dima ra dest bi grevê vêşanî kerdî. Şarê ma wayîrê çalakîya înan vejîya. Heta nika sendîkaya KESKî wayîr nêvejîyabî, labelê nika KESK zî wayîr vejîya. Verê cû Gulmene û Ozakça vatbîy ke ê do heta ke karê xo peyser nêgirî, çalakîya xo ra fek veranêdanî. Nika ti kes nêşêno înan ra vajo, çalakîya xo biqedênî, no raşt nîyo.”

Kedkaran ra Nuyen Yildirime zî va ‘waştişê Nurîye û Semîhî waştişê heqdar î’ û wina domnaye: “Heta ke waştişê înan nêrî qebulkerdiş, ê do grevê xo bidomnî. Ê do xover bidî û qezenç bikerî. Yê ke ewro vanî wa grevê xo biqedênî, ganî nê vengdayîşî hukmat rê bikerî. Nurîye û Semîh badê ke heme çîyî kerdî, dest bi grevê vêşanî kerdî. Îmze komkerdişê înan yeno manaya veng vetişê çalakîya înan.”

Cewabo tewr baş 

Kedkaran ra Aynur Barkine zî va ‘zaf tewirê xoverdayîşî estî û yê ke raştê neheqîyî yenî, nînan ra yewe weçînenî’ û wina dewam kerde: “Ê bi îxraçkerdişê ma waştî ke ma bi vêşanî terbîye bikerî. Nurîye û Semîh zî bi grevê vêşanî cewabo tewr baş dayî. Nurîye û Semîh mesajê ‘eke şima wazenî ma bi vêşanî terbîye bikerî, ma zî bi vêşanî xover danî’ dayî. Şima eşkenî piştî û eşkenî nêdî zî, labelê ganî şima vera îradeya înan de rêz bigirî. Ganî înan ra qedênayîşê grevê vêşanî nêro waştiş. Madem îmze kom kenî, ganî seba ke şert û mercê qedênayîşî bêrî awankerdiş, îmze bêrî komkerdiş. No vera îradeya xoverdakaran de bêrêzî yo.” 

‘Nobeda Piştîdayîşî’ ramena

Heto bîn ra çalakîya ke seba piştîdayîşê Gulmene û Ozakça Kadikoy de bi nameyê ‘Nobeda Piştîdayîşî’ yena kerdiş, roja xo ya 15. de dewam kena. Çalakî hetê akademîsyene Hazal Halavute ra dewr ame girewtiş.  


DÎHABER/ANQARA