26ê têşrîna peyêne ya 1993î de hukmatê Helmut Kohlî qedexeyê PKKyî îlan kerdbi. Qedexeyo ke keweno serra 25. hetê kurdan û hetanê demokratan ra bi aktîvîteyanê cîya- cîyayan yeno protestokerdene.
Nê aktîvîteyan ra yo tewr muhîm zî paytext Berlîn de 1ê Kanûne de do bêro viraştene. Xeylî sazîyê sîvîlî, merdimê zanaye, akedemîsyen, huqûqnas, parlamenter, rojnameger û pawitoxê heqanê merdiman çalakîyêka hempare organîze kenî. Çalakî û mîtîngo ke do bi sloganê ‘Waştişê azadîye nêno qedexekerdene - vera qanûnê polîsan, qedexeyê PKKyî û nîjadperestîye mucedeleyo hempar’ bêro viraştene, hadreyîya çalakîyan dest pêkerd.
Organîzetoranê aktîvîte bi eşkerayîya hempare da zanayene ke qedexeyê PKKyî cuya şarê kurdî ser û bin kerdo û wina veng da: “Hukmato federal ganî cade qedexeyê PKKyî wedaro. Eşkera yeno zanayene ke komelê Almanya zî nê qedexeyî qebul nêkeno. Hem wextê Kobenê de hem zî protestoyanê G20î yê Hamburgî de ma dî ke xeylî heqî dîyayî polîsan. 1ê kanûne de ma vejîyenê kuçeyan û paşgêrîya Almanya yê Tirkîya protesto kenî.”
Rayîrraşîyayîşo ke 1ê kanûne de saet 12.00 de meydanê Alexanderplatzî de do dest pê bikero xeylî hetê demokrasî tewrê ci benî û yeno pawitene ke grûbê femînîst û antî- faşîst zî tewrê ci bibî. Sere de NAV-DEM, YXK û sewbîna xeylê sazî û dezgehî zî destek danî çalakîyan.
ANF / BERLÎN