Çi heyf ke rocê ma yê eyroyî de ancî aştîwaştey û heqwaşteyî mecbûr manenê ke bikoyê greva veyşanî. Dimayo ke hetê rayedaranê dewleta ra keda Rayberê şarê Kurdî ya semedê ardişê aştî veng amî vetişî û bi awayêke bêhiqûqî dîtişê ey ame astengkerdişî hetê pêkamyayenê siyasî yê Kurdan ra zehf rayan rayedaranê dewlete ra ame waştişî ke nê rewşê alozî raştera wedaro û ancî ageyrê masaya çareserî la, ti verepersêke pozîtîf hetê rayadaran ra nêame dayîşî.
Loma nê heme pêkamyayanê siyasî yê sey PDŞ(HDP), PHD(DBP), KCD, KJA û saziyanê bînan ê Kurdan 31’ê Tebaxe de bi rayîrê çapemenî îzah kerd ke semedo ke 500 roc ra zêde yo ke hemdîtişê bi Rayberê înan dir yeno astengkerdişî û rayîrê çareserîya siyasî ameyo girtoşî ko di 5’ê Êlûne de bi 50 tenan grevê veyşanî yo bê wext û dorageyrayî bêro destpêkerdişî.
Semedê aştîya mîyanberê şaran û bicaamyayîşê heq û hiqûqê merdimî nê her di waştişê înan zî waştişêke di ca de yê û eke famkerdişê rayedaranê dewlete bibo yan zî başîya Tirkîya û şaranê aye biwazê ko rocêke verê rocêke nê her di waştişanê heqdaran bigîrê verê çiman. Nê her di rewşî zî tenê şarê Kurdî eleqedar nêkenê. Bi qasê şarê Kurdî, şarê Tirkî û şaranê bînan ê Tirkîye zî eleqedar kenê.
Loma no grevo ke hetê şarê Kurdî ra ameyo destpêkerdişî lazim o ke hetê şarê tirk û heme şarê bînan ê demokratîk û aştîwaştan ra zî bêro destekkerdişî. Wexta ey bêveng bimanê zirar deyeno heq û hiqûqê înan ro zî. Ne heq û hiqûqî ne zî aştî û demokrasî bi hetêke tenê ra nînê awankerdişî. Heta her di hetî pêdir nêwazê, awankerdişê înan zehmet o. Hema vace nizdê vîfst serre yo ke şarê Kurdî tekoşîna aştî û demokrasî dano la her hewe zî verepersê nê waştişê ey o merdimîn bi şerr û zordestî veng yeno vetişî.
La ancî ey qerardar ê ke xo û heme şaranê bînan biarsinê heq û hiqûqê raştî yê merdimahî û nê welatî bi aştî, azadî û demokrasî bixemelnê.
Nesrîn Navdar
Nesrîn Navdar