Çalakîyê ke seba weşî, ewleyî û azadîya Rayberê Şarê Kurd Abdullah Ocalanî yenî kerdiş, dewam kenî. Nê çalakîyan ra yewe zî çalakîya ke vernîya Konseyê Ewropa û CPTyî de 23ê Teşrîna verêne ra nata dewam kena ya.
Seke yeno zanayîş çalakîye bi îzehetê 63 dezgeyan dest pêkerdbî û çalakîye roja 29. de dewam kena. Herçiqas ke hewa serdin o û şertê zimistanî estî, labelê reyna zî kurd û dostê kurdan çalakîya xo domnenî.
Çalakgêrî bêvengîya dewletanê Ewropa şermizar kerdî û sloganî eştî. No hewte 40 kesê ke kurdanê rojhelatî ra pê ameyênê, beşdarê çalakîye bîyî. Mîyanê nê 40 kesan de endamê Platformê Zagrosî, PJAK û KODARî estbî. Çalakîye de deyîrê kurmancî û soranî vatî û govend girewtî.
Rayber Apo hêvîya merdimîye yo
Kurdê ke beşdarê çalakîya roniştişî bîyî, dîyar kerdî ke Ocalan tena seba kurdan nê seba heme merdimîye wayîrê felsefeyêk o û azadîya Ocalanî waştî. Hunermend Celal Dalawuyî va ‘Rayber Apo tena seba kurdan nê, hêvîya şarê kurdan o’ û wina dewam kerd: “Dewleta tirk 19 serrî yo ke binê tecrîdî de yo. Wezîfeyê ma viraştişê çalakîyan o. Çimkî Rayber Apo hêvîya heme kesê ke azadî wazenî yo. 27 rojî yo ke kurdî tîya de yî û amancê ma azadîya Rayber Apoyî yo. Heta ke CPT şêro Îmrali çalakîyê ma dewam bikerî.”
Ma wazenî Ocalanî ra xebere bigîrî
Menuşah Rojhelatî zî dîyar kerd ke ê Ocalan ra xebere nêgênî û wina dewam kerd: “Ma Rayberê xo ra 2 serrî yo ke ti xebere nêgênî. Ma ciwan û extîyarî heme tîya de kom bîyî, cok ra ma wazenî xebere bigîrî.”
Jala Mihemede zî va ‘dewletê herême zî kurdan ser de zextî kerdî’ û wina dewam kerde: “Ewro nê zextî şexsê Rayber Apoyî de yenî bicaardiş. Ma nê kerdişan şermizar kenî. Ma wazenî xeberêk bigîrî. Ma 4 parçeyê Kurdistanî ra ameyî û tîya de çalakîye virazenî.”
Xebat Mihemedî zî wina va: “Rayber Apo tena yê kurdan nê, rûmetê heme merdimîye yo. Kurd û dostê kurdan seba azadîya ci tîya de yî. Ma veng danî welatanê Ewropa, wa seba azadîya Rayber Apoyî Tirkîya ser o zextan bikerî.”
Beyruz Dîreqşanî zî va ‘ganî seba azadîya Ocalanî dezgeyê Ewropa bikewî dewre’.
ANF/STRASBOURG