Guçiknustox fekê xo keno ra, vano “rêxistina terorîste”.
Radyovan fekê xo keno ra, “rêxistina terorîste”.
Tirkiye de taye siyasetvanan vatîsê xo vurnayî, hama taye karkerê çapemeniya tirkî nî vatîsanê kanan de israr kenê. Nêwazenê bivuriyê.
Nêwazenê, çike nonê xo kenê vîndî. Karkeranê çapemeniya tirkî hata nika rantê herbê qilêrinî werdenê. Bi destcikerdena qeseykerdîsanê haştiye raya rantî giran giran birîna.
Hukumato tirk PKK de qeseykeno, taye hona xeberan de, quçikan û panelan de vanê “rêxistina terorîste”.
Eke nêtersê, hen osenoke wazenê jê Kemal Kiliçdaroglu û jê Devlet Bahçelî qesey bikerê.
Eke nêtersê, wirzenê ra vanê “AKP terorîstan de qesey kena.” Hama tersenê. Rind ke tersenê. Zovîna homete axu kenê.
Raştiye de nî karkerê çapemeniye bi xo terorîst yê. Çike bi gonî benê weyiye. Na gonî ke nêbo, belka nî mordemê niyanenî kar zî nêvînenê. A roze jede dûr niya. Xêra heqî ser a roze ke amê, çapemeniya tirkî de herdlerzode girs yeno meydan. Tersê xêle karkeranê çapemeniya tirk zî hora na wo.
Seke sîyasetê tirkî de herdlerz bî, xêle siyaysetvanê kanî werte ra bî vîndî, çapemeniya tirk de zî niya berno. Ez hen omid ken.
Rantwerî gune şerê.
Kesoke nêşîkîno binê şertanê normalan de rojnamevaniye bikero û hata nika dowildariya herbî kerda, gune şero.
Çapemeniya tirkî rê jû şoreş lazim o. Çike bi mezgê kanî, zîhniyetê kanî û nijadperestiye haştiye rê xizmeta çapemeniye nêbena.
Kanperestî û nijadperstî gune çapemeniya tirkî ra bêrê kaxkerdene. Rantwerî verê Tirkiya demokratîk de jê dêsê kori yê. Nêverdanê û nêwazenê Tirkiye avê şero. Nêwazenê qomê Tirkiye jûvînî boye bikerê.
***
CHP qerarê xo da, kan manena. Kamî ke hata nika vatenê ‘CHP xo kena newe’ pê xo xapit. Kemal Kiliçdaroglu yardimkara xo Gulseren Onanç desinde rusnê, Bîrgul Ayman Guler CHP de guerete. Hurd tucelîzan, Kemal Kiliçdaroglu û Huseyîn Aygun rê xêr bo.