Çareserî bi Ocalan’î yena

Pawitox û wasiyê Rayverê Şarê Kurd Abdullah Ocalan’î Mazlûm Dînç’î vist vîrî ke, ê ti şiklî nêşkenê Ocalan’î ra xeber bigîrê û va, ‘çarekerdiş bi wedarnayîşê tecrîdî beno. 

Mazlûm Dînç ke derheqê  sîstema tecrîdî yê Îmrali de ANF rê qisey kerd, vist vîrî ke 27'ê Temûza 2011’î ra na het destûr nîno dayen ke pawitoxî bi Ocalan’î ra pêdîyayin virazê. Dînç’î aşkere kerd ke pêdîyayîşê tewr peynî yê Mehmet Ocalanî ke 11'ê Îlone 2016’î de viraşt ra dima, Ocalanî ra xeber nêamê girewten.  Dînç’î da zonayen ke Rewşa Îstîsnayî Îmrali de destpê kerd û vist vîrî ke manîkerdişê pêdîyayîşan qanûnî nîyo. 

‘Hiqûqî nîyo, sîyasî yo’

Dînç’î dîyar kerd ke, qeraro ke vera Birêz Ocalan ameyo girewten, qerarêko sîyasî yo. Selahîyatdarê hikûmet na babedî bi hawayekî akerde zî aşkere vanê. Mazlûm Dînç’î  ard ziwan ke manîkerdişê pêdîyayîşan eleqeyê xo bi konseptê şerî ra esto û wina dewam kerd: “Wexto ke bi Îmrali ra eleqe birnîya,  konsepteke giran ê şerî  ser Tirkîye ame ferzkerdiş.  Dima ra zî pêlo tepiştiş û kiştişî destpa kerd. Xêlê reyî ame dîyayîş ke Birêz Ocalan merkezê  çareserî û dîyalogî yo.”

Wasiyê Rayverê Şarê Kurd’î Mazlûm Dînç’î waşt ke tecrîd desinde bîro wedarnayîş û wina dewam kerd: “Ganî şert û mercê tîvarî û serbestî yê Ocalan’î bîrê rindkerdiş. No zî şertê destpêrê yê çarekerdişê meseleya kurd ya bi raya demokratîk û haştî ya.” 

‘Kenê qurbanê hemsencîyanê sîyasî

Dînç’î da zonayen ke seba qedînayîşê  îşkence yê Îmrali înan serpirodayişê Mehkemeyê Heqê Merdiman ê Ewrûpa û CPT kerdo. Mazlûm Dînç’î vera îşkenceyî bêvengîya sazgehanê mavênneteweyî rê reaksîyon damûsna û wina va: “Ma vînenê ke nê sazgehî na babede kenê qurbanê hemsencîyanê sîyasî. Wexto ke babed bena kurd û Birêz Ocalan, prensîbê heqê mordeman ê esasî nedîyayîşî ra yenê. 

‘Çareserî wedarnayîşê tecrîdî yo’

Pawitox Mazlûm Dînç’î Rojbîyayîşê Ocalanî bimbarek kerd û bi no vengdayîşî qiseyê xo qedêna: “Ma veng danê raya pêroyî ke seba wedarnayîşê sîstemê tecrîdê giran, mesûlîyetanê xo bîyaro ca. Zerreyê konseptê şerî de xêlê bêhiqûqî yenê kerdiş. Wedarnayîşê îşkence û tecrîdî do bibo sebeb ke Birêz Ocalan bieşko rolê xo kay bikero û Tirkîye bikewo rewşeke demokratîkbîyayîşî.