Endamê Desteya KKPî Maçîn vat ke na komxebate de her kes seba tifaqa netewî ser fikrê xo ardî ziwan, Serekê Partîya Azadî Aşîtî zî dîyar kerd na komxebat do biba wesîleya dewleta Kurdistanî.

LÊL AMED / AMED

Amed de bi beşdarîya sazîyê DTK,DBP,HDP,TJA,DDKD,PÎA,KKP,PDK-BAKUR,PDK-T,Partîya Azadî, temsîlkarê STK û pîrê şarî komxebata tîfaqe ame viraştiş. Komxebate 2 rojê domya. Komxebate de taybetî seba modela tîfaqa netewî ser persê sey ‘Meclîsê Netewî’, ‘Kongreya Netewî’ ya zî ‘Cepheya Demokratîke’ ser ameyî vindertiş.

Netîceya komxebate de ame parekerdiş ke yew komîsyonêk bêro awankerdiş û no komîsyon z;î seba tifaqe modelan cigêrayiş biko. Beşdaran dîyar kerdî ke no seba kurdan xeyalêko seserrî yo. Endamê Desteya KKPî û Wekîlê Rihayî yê HDPî Nusret Maçîn zî beşdarê na komxebata tarîxî bî û şîroveyê xo ard ziwan.

   

Endamê Desteya KKPî Nusret Maçîn aşkera kerd ke na komxebate de her kes seba tifaqa netewî awan bibo, fikrê xo ardî ziwan, heme beşdaran zerrîwaşteyê û wina vat: “Waştişê şarê ma zî tifaqa kurdan o. Bandorê şarî sîyasî ra zaf bi gird o. Hêrişê Rojawan, Başûrî, hedîseyê Rojhelatî û 40 serrî zî Kurdistanê Vakûrî de zey şerêko leymin dewam kenê. Bi hezaran qadroyê ma yê sîyasetî û bi desan wekîlê ma zî nika zîndanan de yê. Seba medyaya komelî ciwanan ra doz yenî akerdiş û her hetî ra hêriş domyenê.”

Vera prosesi ma do cewab bibê

Endamê MYKî yê KKPî Maçîn bal ont vera kurdan tifaqa AKP û MHPî û wina domna: “Rejîma AKP û MHPî de konsepta şerî awan kerdî. Vera Kurd û Kurdistanî na konsepte meşnenê. Ma na konsepte Efrîn, Girê Spî û hêrişkerdişê Kerkukî de dîyê. Ewro zî Kurdistanê Başûrî de operasyonê dewleta tirkî dewam kenê. Taybetî Girê Spî de dewleta tirk bi destê Arteşê Surîyeya Azade de qetliman viraştê. Kurd ganî vera prosesî de bibê cewab. Cewabbîyayişê tena meseleyê partîyêk nîyo, netewî yo. Heme hetê ra na mesele de ganî partîyan yew bibê û kurd çi wazenê persê. Stratejîya dewletan seba mintiqayî estê, belê stratejîya kurdan çi bibo? Bi çi rayê serbiko û no ser ma tifaqa netewî ser o qise bikê.”

Waştişê nêzdîya federasyonî yo

Maçîn dîyar kerd ke ganîyo ke partîyan menfaaetê xo vera de cayê ke û menfaetê netew û şarî bidê ver û wina dewam kerd: “Çareserî zî tifaqa netewî ra vîyarena. Ma waştişê xo de yew bibê, ma vanê federasyonêko di şar, pîya û îradeya şaran. Heme bernameya partîyan waştiş nêzdîya federasyonî yo. Fedarasyon seba raştinîya Tirkîya zî tewro weş sîstemêko musaît o û no ser zî ma wazenî ewta de tay komîsyon bivejê. Rayberîyêk bêro awankerdiş û na rayberî zî mîyanê xo de bername awan biko. Nê sazî û şexsîyetêkê beşdarê na xebate nêbîyê seba înan komîsyonêko têkilîye do awan bibo. No komîsyon zî do heme hetan ra têkilî birono. Na komxebate de ganî verfekî bêro weçînayiş.”

Maçîn tewro peynî wina qedîna: “Nika çimê heme dinya kurdan serî yo, hedîseyêkê Iraqî de mîyanê Îran û Amerîkayî de bîyê, ma zanenê ke Îran de kurdê ma yenî binçimgirewtiş û ciwanê ma zî yenî îdamkerdişî. Çi heyfo ke Îran de îdamkerdişê kurdan rewşêk bîyo asayî. Seba ci ganî 4 parçe de ma do menfaetê şarê xo bigê verçiman û goreya ci ma bernameyêk bidî verê xo.”

Biba wesîleya Dewleta Kurdistan

   

Serekê Partîya Azadîye Ayetullah Aşîtî zî komxebate ser o aşkera kerd ke raya yewine ke tewir bi tewir partîyê kurdan beşdarîyêk komxebatêk yena viraştiş, ê omidarêk î do bibo wesîleyêk û wina domna: “Nê hêz bi rastî pîya bimeşê, her kes bi fikir û ramanê xo bîyaro ziwan, zey feodalîya kurdan her kes bivajo ez ma serkewt nêbenê. Eke her kes bivajo komel vano se û mutabakat çi ser ameyo kerdiş. Ez şexsê xo seba tifaq heme xebatan ra amede ya. Ez bawera na komxebat biba wesîleya Dewleta Kurdistanî.