Çend rojî verê Amerîkaye derheqê fermandaranê PKKyî Cemîl Bayik, Murat Karayilan û Duran Kalkanî de qerarê tepiştişî girewtbî û seba înan xelata pereyî ronaybî. Her ke şono vera na rewşe de reaksîyonî zêde benî.
Parlamenterê YNKyî yo kehen Salar Mehmûdî zî reaksîyon nîşanê qerarê Amerîka da. Mehmûdî ser hesabê xo yê medyaya komelkî ra reaksîyon nîşan da. Mehmûdî dîyar kerdo ke cayê înan zerrîya şarê Kurdîstanî de yo.
Mehmûdî vato ‘cayê şorişgêranê kurdan zerrîya kurdan de esto’ û wina domnayo: “Dinya herinda ke dagîrkeran ceza bikerî, kesê ke seba azadîya kurdan têkoşîn danî qurbanê sîyasetê mîyanneteweyî kenî. Wa kerem bikerî, heqê kurdan bidî. O wext kurdî zî do sîleh û şer ra nefret bikerî. Kurdî seba ke sîyaset kenî erzîyenî zîndanan, seba ke xo pawenî, hêrişê înan benî. Gelo wa kurdî se bikerî? Ganî kurdî vera nê neheqîyan de pîya hereket bikerî. Kurayê dinya de beno wa bibo, pawitişê kurdêk wezîfeyêko neteweyî yo.”
SILÊMANÎ / ROJNEWS