Dersim de ke çar dorûverê ci bi qereqolan ameyê girewtiş û bi polîtîkayanê "herêmê tîvarîyê taybete” ameyê tometkerden, endî şîyayîşê Gola Bûyere zî ke cayekê bimbarek o ame tometkerdiş.
Dersim de na jû serra peynî de operasyonê leşkerî bêmavên ramenê. Her ca de qereqol û qalekolî virazîyay. Her serr bi ameyişê wesarî ra pîya seba dasilasnayîşê rindekîyê tarîxî û xoza yê Dersim gêrayîşê xoza destpê kenê. Nê gêrayîşî emserr raştî "herêmê tîvarîyê taybete”, bi nameyekê bîn raştê qedexeyanê dewlet yenê. Xeylê welatijê ke seba cografyaya Dersim bivînê cayanê dûrî ra şinê Dersim, nuqtayanê qontrolî ra peyser yenê açarnayen.Tewr peynî de wexto ke xozaheskerdoxan waşt şirê Gola Bûyere ke jew cayanê bimbarek yê Dersim ra yo û hamnanî de bi rindekîya xo hayr anceno, bi qedexaya qereqolê cendirmeyan rî bi rî mendî.
‘Dersim açarnay zîndanî’
Organîzatorê geyrayîşî Haydar Çetînkaya ke derheqê babed de qisey kerd vist vîrî ke Gola Bûyere cayekê bimbarek yê Dersim o. Çetînkaya da zanayîş ke bi şîyayîşê Gole înan do him cayê bimbarek zîyaret kerdba û him zî xozaya ewja û wina va: “La çi heyf ke, bi behaneyê herêmê qedexe destûr nêday gêrayîşê ma. Ma welatêko ke endî nêşkenê şirê zîyaretê jîyaranê xo bikerê, şirê dewanê xo û xozaya xo bifetelînê de ciwîyenê. Mi aşman o ke no rewşe hina dewam keno. No mantiq mantiqekê raşt nîyo. Adeta Dersim açarnayê zîndanî. Hona zî vejyenê û behsê demokrasî û serbestîye kenê.”
Behrê Sîya, Behrê Spî û Ege rê destûrgirewtiş hewce nîkeno
Çetînkayayî ard ziwan ke, rîwalo ke ê nêeşkenê caûwaranê xo yê bimbarek zîyaret bikerê, ê dejayeyê û hayr ant herêmanê Tirkîya de çinîbîyayîşê qedexeyan ser: “Şirê wareyanê (zozan) Behrê Sîya, Behrê Spî û Ege nîyadê. Şima her ca de serbest ê. Hema vaje ti rewşeke ke tabîyê destûrî bo, çin o. La çi heyf ke nê cayan de seba ke ma şirê zîyaretê caûwaranê xo yê bimbarek ma mecbûr manenê ke destûr biwazê, la o zî nîno dayîş.”
Ma nê qedexeyan raşt nêvînenê
Haydar Çetînkayayî ard ziwan ke ê nê qedexeyan raşt nêvînenê û qiseyanê xo bi nê vatişan qedêna: “Raştî zî eke cayekê birîsk bo xo ra ma bi xo nêşinê û nêwazenê bi talokeyan ra rî bi rî bimanê. La belê nêşîyayîşê Gola Bûyere ya bimbarek û wareyan sebebê verkewtişî yo. Xwezî (kaşka) ma qe bi hewayêko fermî serpirodayîş nêkerdba û ma şîbiba. Qe nêbo do nîyetê alwozanê ma yê qurbancikerdiş û nîyazdayîşî biamebîya ca. Ma nê qedexeyan raşt nêvînenê."
DÎHABER/DERSIM