ÇEDî raporê xo de rijnayîşê tebîetî nîşan da

Rijnayîşê herêma Ege bi qerarê walîtî dewam keno. Herême bîya hedefê şîrketê madenan û herême de polîtîkayê îmar, projeyê RES û xebatê madenan estî. Walîtî dewa Çakallarî ya Qezaya Balya ya Balikesîrî de destur daye viraştişê sondajan. Raporê ÇEDî de rijnayîş û talankerdişê Erîşîmler Mermer ve Seramîk Sanayî ve Tîcaret A.Şî ke cigêrayîşê maden, petrol û jeotermalan keno, ameyo nuştiş.

Goreyê raporê ÇEDî seba ke maden bêro vetiş daristanana ser  de planî yenî amadekerdiş. Dormeyê nê daristanan de zî hêgayî estî. Seba pêardişê projeyî 143 donime erdî ser de 6 cayan de xebatê sondajî ke xorînîya înan 25 metre ya, do bêrî kinitiş. Kinitiş de bi tonan madeyê polîmê sîrkulasyonî û bentonîtî ke tede madeyê kîmyasalî yê kanserojenî estî, yenê xebetnayîş. 

Babete ser o Verfekê Cuya Tebîî ya Tebîetî Tuncay Karaçorluyî qisey kerd.Karaçorlîyî wina va: “Destur û qerarê ke yenê dayîş do herême de bibî sebebê rijnayîş û texrîbatanê xeylê giranan. Herême de vilikê ke ver bi çinbîyayîşî de yî, estî. Nê vilikî viraştişê projeyan ra dima temamî do çin bibî. Seba pawitişê tebîetî, ganî nê vilikî bêrî pawitiş. Raporê ÇEDî de her tewir rijnayîş ameyo nuştiş. Ma seba betalkedişê projeyî, amadekarî kenî. Ganî ma wayîrê mîrasê xo yê kulturî bivejyî, Heskîf û Çakallarî bipawî. Sewbîna zî ganî ma destur nêdî xebetnayîşê kîmyasalan. Eke ma wayîrê tebîetî nêvejyî do erdê ma yê şên û daristanî nêmanî.”