Verecoy vajîme: Eke vajiya cemxane û camî têlewe de virajînê, mordemî rê wes yeno. Mordem vano “ma qey se beno, rind ke niya beno. Însanî babet babet îtîqan ra yenê têhet, jûvîn de qesey kenê, jûvînî naskenê.”

Raştiye de felsefa alevîyan de na esta. Pêro îtîqatî seweta aleviyan jû yê, cirê dismeniye nêbena. Hama bêrê reye peye na proja de niyadîme!
Eskerakerdîsê Fetullah Gulenî estê û vano: “Bi taybetiye aleviye Dersîmî mara niyê, Nasturî yê. Hama Taxtacî mara yê, nînan de problemê ma çînê.” Gulen îta de aleviyan keno cera. Nêwazeno estbiyayena aleviyan qebul bikero. Seweta nî vatîsan hata ewro leborîna xo zî nêwasta. Eke leborîna xo aleviyan ra biwastenê, mordemî vatenê Gulen fikrê xo vurno, xeletiya xo diya. Hama niya nêkerd.
Hetê bîn ra hukumatê tirkî hata nika estbiyayena aleviyan, jê îtîqatedê xoserî qebul nêkerda. Serokwezîrê tirk Recep Tayyîp Erdoxan seweta vatîsê xo “cemevî cumbuşevî” aleviyan ra leborîne newasta. Yanî hem Fetullah Gulen hemzî Recep Tayyîp tîra xo erzenê jû gol. Hem aleviyan rê heqeret kenê, hem zî leborîna xo nêwazenê.
Fetullah Gulen na proje de teyna niyo. Jû “alevî” bi name Îzettîn Dogan gureto lewê xo. Seweta Îzettîn Dogan nasbiyayena aleviyan hetê dewlet û cematan ra qeyta muhîm nêbiye. Derdê Îzettîn Dogan kirşî û pereyî bî. Jû argumanê xo esto vano “ her çî cematê Fetullahî dano.” Yanî peranê arsa û virastene cematê Fetullahî guretê xo ser. Derdê Îzettîn Dogan na wo.
Ma zoneme, hata ke aleviyenî jê îtîqatî nêama naskerdene û bi îtîqanê bînan têdust de niya, na proje teyna riznayena aleviyenî rê xizmete kena.  Taye alevî eskerakerdîsan danê û na proje jê proja birayenî vînenê. Nî alevî birayenya xiravine ciwiyenê. Pars kenê are, kewtê ra astik û postikî dime.
Qetlîamê ke dewleta tirkî tarîxê xo de kerdê, werte derê. CHP ra bije hata AKP qeyta jû partiye bi namê dewlete aleviyan ra efê xo nêwasto. En jede alevî demê serdestiya CHP de ameyî qetil kerdene. Hama xêle aleviyan nî qirkerdîşî xo vîra kerdê û CHP rê xizmete kenê.
Hal ke nîya bî, alevî ke xorê wayîr nêvejayî, qetilkaranê xo dime şî, caye de hukmê xo nêbeno, her kes hetê xo ser onceno û roseno.
Fetullah Gulen na hal rind naskeno. O zî nika Îzettîn Dogan ser aleviyan beno camiye. Na zî asîmîlasyon ra do het qedenayen a. Çike cawo ke mordem têdust nêbî, o ca heqa weşiye yê bindestan nêbena.
Alevî gune seweta nasbiyayena xo pêrodê. Pars aremekerê û qetilkaranê xo dima meşerê!