23ê teşrîna peyêne de dewa Hucetî ya ke girêdayeyê qezaya Çinarî ya Amedî de hêzê dewlete eştbî keyeyêk ser de û netîceyê sereştişî de kesêk înfaz kerdbî. Dima ra amebî aşkerekerdiş ke keso ke ameyo înfazkerdiş endamê HPGyî Cebraîl Karçi yo.
Cenazeya Karçiyî wedarîyabî nêweşxaneyî û herçiqas ke 15 rojî yo ke nameyê ci hetê walîtîya Amedî ra ameyo aşkerekerdiş zî cenaze nêdîyena keyeyê ci. Badê ke name ame aşkerekerdiş, keyeyê Karçiyî muracatê Serdozgerîya Komare ya Amedî kerd, labelê keyeyî hîna cenazeya xo teşhîx nêkerdo. Keye nika netîceyê DNAyî paweno.
Heto bîn ra wextê sereştişî de endamanê keyeyî ra Mehmet Ozdemîr, Hacîre Ozdemîr û Talat Ozdemîr ameybî tepiştiş û sewqê edlîye bîybî. Înan ra Mehmet Ozdemîr bi îdîaya ‘endamê rêxistine bîyayene’ ra ame tewqîfkerdiş. Her di yê bînî zî bi şertê kontrolo edlî serbest ameyî veradayîş.
MA/AMED